Gulîstan Azak

 

MELETÎ - Fotografê Yuksel Kalina Elewî ke Meletî de taxa Cemal Gurselî keyeyê aye ame nîşankerdiş, zaf ame qiseykerdiş. Semedê Yuksele hîn kesan va 'tersena' hîn kesan zî va 'endîşeyîn a' Yuksele ke emrê aye hemverê hêrişê nîjadperestan bi nobetan derbaz bi, dîyar kerdî ke ê mecburê pawitişê xo yê xoserî bikerê.

 

Fotografê Yuksel Kalina Elewî ke Meletî de taxa Cemal Gurselî de keyeyê aye ame nîşankerdiş, zaf ame qiseykerdiş. Yuksele derheqê fotografî de dîyar kerde ke fotograf de nêtersena, serd ra qerisêna.

 

Yuksele dîyar kerde ke ê semedê nê hêrişan bi halê Tirkîya de xeylê xemgîn benê.

 

'Emrê ma bi nobetan derbaz bi'

 

Yuksele ard ziwan ke hêrişê hemverê Elewîyan ê Meletî xo risneno serrê 1978an û va: “Serra 1978an de şaredarîya Meletî o wextî Hamît Fendoglu ame kiştiş û reyna ma Elewî berpirsîyar ameyî vînayîş. Reyna ma rastê hêrişê girsî ameyî. Wextê hedîseyê Hamîdo de kargerîyê ma, keyeyê ma ameyî veşnayîş, ma ameyî kiştiş, ma rastê hêrişê kerreyan ameyî. Wexto ke ez qij bîya maye û pîyê mi, ma kerdî zere û tebera nobete. Nika zî ez bîya pîl, ez domananê xo kena zere, bera ser ê înan de gêna û nobete gêna. Ewro halê Elewîyan eynî yo. Emrê ma nobetan derbaz bi."

 

'Ma Gurgum nêkerdo xo vîr ra'

 

Yuksele da zanayîş ke heme hêriş bi plankerdişê û serrê 60î heta serrê 90an bîyê şahidê hedîseyan û wina va: "Elewî her wext hedef ameyî girewtiş. Hewldayîşê darbeyê 15ê Temmuze ma berpirsîyar ameyî vînayîş û ma ameyî kerrakerdiş. Ma hema Gurgum, Sêwas, Çorum nêkerd xo vîr ra. Taxa ma aşmêk de hîrê rey rastê hêrişê çekdarî amî. Verê ke keyeyê ma bêrê nîşankerdiş, ma aşmêk taxa xo de kovan kom kerdêne. Taxa ma her wext ambulansêke geyrayne. Rojêke mi da vindartiş û ci ra pers kerd, la lezgînî dûr şî. Ez 112 geyreya û mi pers kerd. La vatî ma ambulanse nêeşrawitê. Bêguman ma heme polîsan berpirsîyar vînenê."

Yuksele peynîye qiseykerdişê xo de ard ziwan ke ganî hemverê hêrişan bêveng nêmanê û va ganî xopawitişê xoserî bi ca bîyarê.