Safîye Alagaş

 

AMED – Hamin Aydane 14ê hezîrane de qezaya Xelfetî ya Riha de çarçoweyê cigêrayişî de Serdozgerîya Komare ya Amedî de ameye tewqîfkerdiş û raştê îşkenceyî ameye. Îşkence de poşet lefînayî sereyê Hanime û aye derb kerdî. 

 

Avûkatê ÎHDyî şîyî pêvînayişê Hanime û îşkence qeyd kerdî. Hanime 10 rojan bin çiman de mend û dima ra ameye serbest veradayiş. Hanime badê ke serbest ame veradayiş derheqê polîsê îşkencekaran de muracatê mehkema kerde. Hanim nêweşxane ra raporê derbî girewt, labelê dozgerî îdiakerd ke ‘raporê edlî de nîşane çin o’ û cok ra zî derheqê polîsan de qerarê bêşopnayişî dayo.

 

Hanime muracatê xo yê dozgerî de vata: “Xelfetî de keye û baxçeyek mi estî. Ez saet 13.00î de ameya tewqîfkerdiş. Mi nêzana ke yê ke mi tepiştî polîs î. Mi înan ra persa, labelê cewab nêdayî mi û nêverdayî ke ez qisey bikera. Mi bi zorî wêşnayî wesayîtî. Destê mi pey ra kelepçe kerdî û poşet kerdî sereyê mi. Ez nêeşkayêne hawa bigîra û hertim dayêne sereyê mi ro îşkence bi mi kerdî. Ez raştê xeberê nêbaş û heqaretê înan ameya. Na rewşe heta mudirîya Riha dewam kerde. Badê îşkenceyan mi berdî mudirî dima ra berdî nêweşxane. Her çiqas ke şopê derbî mi ser de bibî zî doktor mi derman nêkerdî. Dima ra ma ameyî Nêweşxaneyê Dewlete yê Selahattîn Eyyubîyî yê Amedî. Tîya de mi raporê derbkerdişî girewt û laşê mi de birînî ameyî tespîtkerdiş.”