MÊRDÎN - Endama Meclîsê HDPî yê Mîdyatî Dîba Gabrîele dîyar kerde ke tecrîdê ser o Rayberê PKKî Abdullah Ocalanî bandure ser ê heme şarê Tirkîya keno û va: "Dimayê her zimistanî wisar yeno. Ma heme şarî paweyê ê wisarî yê."

 

Endama HDPî yê Mîdyatê Mêrdînî Dîba Gabrîele da zanayîş ke semedo ke tecrîd wirzo, ganî şarê Tirkîya bibê yew û va heta ke tecrîdî rê peynî bidê çalakîyê grevê vêşanî dabî destpêkerdiş dewam bikerê. Dîbaye va: "Ma nê semedê Birêz Ocalan û hepsîyê bînan kenê. Semedê parlamenter û sîyasetmedarê ma bêrê veradayîş, cinî bi hawayêke baş xo îfade bikerê ma do çalakiyê xo dewam bikerê."

 

Dîba ard ziwan ke waştişê înan en pîl ê Suryanî û şarê mintiqa o yo ke newe ra maseya çareserî bêro awankerdiş û wina dewam kerde: "Waştişê ma yo en pîl, masaya çareserî ya. Semedê huzûrê welatî ganî tecrîd bêro wedartiş."

 

'Ma nêwazenê nê şert û mercan de bicuyê'

 

Dîbaye da zanayîş ke pêrodayîşê Kurdistanî her ke şino xidar beno û nê çî ardî ziwan: "Ma wazenê mîyanê huzûrî de bicuyê. Rayîrê ey zî Îmralî ra derbaz beno. Ganî şert û mercê Abdullah Ocalanî bêro sererastkerdiş. Ma semedê cinîyan  û şarê mintiqa nê çî wazènê."