'Waştî bi vêşanî terbîye bikerê la ma bi antreman ê'

 

Zulal Koçer

 

STENBOL - Seher Darilmaza ke 9 aşmî verê amebî îxrackerdiş no demêke yo anketorî kena. Tirkîya de xoverdayîşê hemverê KHKyan sey xoverdayîşê hemverê şîdetî bi hezaran hemwelatî sey mamoste Sehere vatî 'Wexto ke edalet, heq û huqûq bêro no welatî ma do ageyrê karê xo' û têkoşînê xo dewam kenê. 

 

25ê Teşrîna peyêne Roja Têkoşînê Hemverê Şîdetê Ser ê Cinîyan ê Mîyanneteweyî nêzdî beno û cinîyê ke xoverdanê vatişê xo vanê. Tirkîya de bi taybetî serra verê aşma Temmuze ra dima xeylê rey OHAL ame îlankerdiş û xeylê kesî karê xo ra ameyî eştiş. Reyna en zêde OHALî ra bi bandor bî cinî bî. La nê cinîyan va 'Ma bê heq kar ra ameyî eştiş, ma karê xo wazenê' û vejyayî kuçeyan. Înan ra yew zî Seher Darilmaz a. Hem warê xoverdayîşî û hem zî hemverê  ‘bi vêşanî terbîyekerdiş' rê anketorî kena û têkoşînê cuyayîşî dana. 

 

Mamoste Seher anketorî kena

 

Sehere 7ê Sibata 2017 de bi KHK karê xo ra amî durvistiş. Sehere mamosteya 15 serran ê hunerî dîyayîşî bî, eynî wextî de endama Egîtîm Senî bî. Ma aye Sûka Beşîktaşî de wexto ke anket viraştêne dî. Sehere hewl dana merdiman semedê anketî îkna bikero. Dima ra kesê ke îkna kena buro de te dir anket viraznena.

 

Sehera ke bi hîrê, çar aşmîyo no karî kena, qalê îxrackerdişê xo kena: "Ez şewêke de betal menda. Bê cigîrayîş, bê teblîgat ez kar ra ameya eştiş."

 

Keye de nênuşte ro

 

Sehere no semed ra demêke derg xemgîn bîya û pêwa nê çî keyeyê xo de nênişta ro û bi embazê xo yê sendîkayijan dir qerarê xoverdayîşî girewto. Sehere dewamê qalîkerdişê xo de wina va: "Kartal, Kadikoy û Bakirkoyî hîrê mintiqan de hîrê rojî hewteyê bi hawayêke hemdem ma nobetê xoverdayîşî gênê. Ma qerarê xoverdayîşî gênê. Semedo ke şert û mercê ma yê xebate amebi çinkerdiş. Dîplomayê ma bê bandûre verdayî. No semed ra ma nêeşkenê cayêk de zî bixebityê. Ma bê heq kar ra ameyî eştiş. Ganî ma biresnayne merdiman. Ma zî winî kerd.

 

Sehere dîyar kerde ke dimayê prosesê derbeyî ra dima çarçewaya FETO ra ameya îxrackerdiş û va sebebê no zî o bi ke 'perwerdeyê zanistî, layik, bi ziwanê maye û bê pere' pawitê.