Sozda Oremar

 

EFRÎN– Domana êzidî ya ke destê çeteyanê DAIŞî ra rizgar bîye hîs, dej û hîkayeya xo ya esaretîya 4 serran arde ziwan ser û wina va: “Çeteyê DAIŞî her tewir şîdet ma ser de kerd. Ez veng dana heme cinîyê êzidîyan ke wa bibî yew û heyfê xo wa çeteyan ra bigîrî. Cinîyê êzidî deyndarê HPG, YPJ, û YPGyî yê”

 

Şarê êzidî 74 reyo ke qirkerdiş ra yenê viyartiş.  Domana binameyê Rana Reşoye tewrê keyeyê xo şîdetê DAÎŞî re rî bi rî mendê.  Domana êzidî ya 11 serrî Rana Reşoye qala hîkayeya xo ya 4 serran ke destê çeteyanê DAIŞî de esîr mendbî kerde. Reşoye 3ê tebaxa 2013î de çeteyî kewtî Şengal. Aye roje ra dima doman, ciwan, cinî û heme kesî raştê hêrişê çeteyan ameyî.

 

Babete ser domana binameyê Rana Reşoye qisey kerde û qiseykerdişê xo de qala hîkayeya xo ya 4 serran kerde.

 

Rana destpêkê qiseykerdişê xo de wina va: “Ez , 5 waye û 2 birayê xo ma Sîba Şêx Xidirî de cuyayêne. 3 tebaxe de çeteyî hêrişê Şengalî kerdî û ma esîr girewtî. Çeteyî ma berdî Behac û dima ra zî ma berdî Tileferî. Ewja de heme cinîyê êzidîyan rotî. Camêrd û ehtîyaran zî qetil kerdî. Çîyê ke ma cuyayî nînê vatiş. Wexto ke ma Musil de ameyî rotiş ters û xof mi girewt. Ez bêçare menda û qet rayirêk mi yê filitnayişî nêmendbî. Ez 1 serr û nîme Musil de menda û çeteyê ke mi herîna merd. Badê mergê çeteyî, ez Reqqa de ameya rotiş û sewbîna kesî mi herînayî. Çeteyê DAIŞî cuya mi de çîyê ke do qet mi vîra nêşêrî viraştî”

 

Ma deyndarê şervanan ê

 

Rana dewamê qiseykerdişê xo de qala dejê ke anta kerde û wina va: “Çeteyo ke mi Reqqa de herîna amirêko pîl yê DAÎŞî bî û nameyê ci Şêx bî. No kes zî mi Musil de rot. 5 aşmî ez ewja de menda û dima ra mi reyna rotî yewdo dêrazorij. Nameyê ey zî Ebû Bera bî û ey zî amirê DAÎŞî bi. Çeteyê DAÎŞî cinîyan sey halet rotêne. Xeylê reyan mi waşt ke ez çeteyan re birema, labelê her reyan mi dîyêne û dima ra zî mi ser de îşkence kerdêne. Çeteyan pîyê mi qetil kerdî. Maya mi, 3 wayê mi û datêk mi hema destê înan de yî. Wayek mi 9 serre ya û destê înan de ya. 2 waye û 2 birayê mi destê çeteyan ra remayî û filitîyayî. Ez veng dana heme cinîyê êzidîyan ke wa bibî yew û heyfê xo wa çeteyan ra bigîrî. Cinîyê êzidî deyndarê HPG, YPJ, û YPGyî yê. Cok ra ma spas kenê rizgarîya ma bi saya şorişgeran bî.”