Sorgul Şêxo

 

TIL TEMIR - Wekîlê Sereka Kongra Starî Gulîxan Tahir derheqê roja 25ê Teşrîna Peyêne Roja Têkoşînê hemverê Şîdetê ser ê Cinîyan ê Mîyannetewî de şîrove kerde û va: "Cinî şorişê Rojawanî de temamê dinya de veng dayî, nê destkewtişê ke xêrê Rayber Apo kewtê dest ma do heta peynî wayîr înan rê vejyê û merheleyê têkoşînê berz bikerê."

 

Bi wesîleyê 25ê Teşrîna Peyêne Roja Têkoşînê Hemverê Şîdetê ser ê Cinîyan ê Mîyannetewî, temamê Rojawanê Kurdistanî û Vakurê Sûrîye çalakiyê tewir bi tewir yenê organîzekerdiş. Têkildarê nê çalakîyan Wekîla Sereka Kongra Starî Gulîxan Tahire şîrove kerde.

 

Gulîxan Tahir dîyar ker de ke cinî awankerdoxa komelê Neolotîkî û awankerdoxa cuyayîşî ya û wina dewam kerde: "Verê 5 hezar serrî ra cinî awankerdoxa cuyayîşî û komelê Neolotîk bî, cinî mamoste, maye, doktor û sewbînî bî. Bi zanebîyayîşê xo komelêke saxlem serê bingeyê heskerdişî û rêzgirewtişî de awan kerdo. Awankerdoxa cuyayîşî û merdimayî cinî bî. La bi îqtîdarê kapîtalîzmî dir camêrdê wayîrê hişmendîyê îqtîdarî, heqê aye cuyayîşî û heme çî destê cinî ra vet û kerd aîdê xo. Dimayê ke heqê cinî ci ra ame girewtiş, êdî a komele zî bî sey tepişnaye û bî komelake bindest."

 

'Dimayê Şorişê Rojawanî cinî hemverê zulmê 5 hezar serrî sere wedarna'

 

Gulîxane şorişa Rojawanê Kurdistanî sey şorişê cinîyan bi name kerd û wina va: "Verê şorişê Rojawanê Kurdistanî cinî sey hacetêke ardişê domanan ameyne xebitnayîş, la bi takewtişê çirûskê azadî êdî cinî zî hemverê zulmê 5 hezar serrî sere wedarna û va no şoriş şorişê cinîyan o. Bi nê amancî cinî beşdarê heme waran bî. Sey warê leşkerî, sîyasî û ekonomî, bi beşdarbîyayîşê xo zî temamê dinya veng da û bi sembolê cinîyê azadan. Nê destkewtiş û serkewtişî zî heme bi xêrê fikir û felsefeyê Rayberê merdimayî Abdullah Ocalanî kewt dest."

 

'Cinî ameyî perwerdekerdiş û merheleyê zanayîşî berz bi'

 

Gulîxane peynîye qalîkerdişê xo de bale ant ser ê Keyeyê cinîyan û qiseykerdişê wina qedêna: "Şorişê Rojawanê Kurdistanî de awankerdişê Keyeyê Cinîyan gamêke pîl û tarîxî bi. Netîce de cinîyê ke nêheqî înan rê amebi kerdiş, heqê xo girewtî. Heto bîn ra cinî ê keyan cd ameyî perwerdekerdiş û merheleyê zanayîşê înan zêde bi. Nê destkewtişê ke cinîyê Rojawanê Kurdistanî û Vakurê Sûrîye kerdê dest heme bi xêrê têkoşînê Gerîlayê serê koyan o. Ma zî sey cinî heta peynî û merheleya en berz de têkoşînê xo hemverê şîdetê ser ê cinîyan dewam bikerê û şîdetî peynî bikerê."