Zeynep Turgut

 

WAN - Başûrê Kurdîstanî de 12ê teşrîna peyêne de xeylê bajaran de erdlerz ame meydan. Netîceyê erdlerzî de bi seyan merdiman cuya xo vinî kerde, keyeyî rijyayî û texrîbatêke pîl vejya orte. Cinîyê Wanî veng dayî çar parçeyê Kurdîstanî û vatî awe û werdê xo bi Başûr û Rojhelatî dir pare bikerê û bibê hetkar.

 

12 teşrîna peyêne de ser ê sînorê Başûr û Vakurê Kurdistanî bi hêzê  7.2 erdlerz amebi meydan. Netîceyê erdlerzî de ame aşkerakerdiş ke 450 kesî cuya xo vinî kerdî û 6.700 zî birîndar bîyê. Erdlerzî de xeylê keyeyî rijyayî û  texrîbatêke pîl virazya. Cinîyê Wanî veng dayî kurdistanîyan û vatî ke wa heme erdlerzîyan dir hetkarî bikerê.

 

'Wa her keyeyêke parçeyêke nanê xo pare bikero'

 

Cinîya bi nameyê Zûmeyye Cîntan dîyar kerde ke lazim o her kes bi hîsgîrî têbih-geyro û wina va: "Serra 2011 de ma zî erdlerz dî. Bi rastî merdim nêeşkeno behs bikero. Dejêke zaf giran o. 7 serrî ser ra derbaz bi, la sey vizîrî ganî yo. Nika zî Başûr û Rojhelatê Kurdîstanî de erdlerz ame meydan. Erdlerzêke zaf pîl bi. 450 merdiman cuya xo vinî kerdî. Ez bawer a do na hûmare zêde zî bibo. Birîndarê giran estê. Homa şîfa bieşrawo birîndaran û sebir bido keyeyan. Çiqasa destê ma ra bêro ma do bikerê. Ma nêeşkenê çîyêk bikerê la gerek ma bi bîyayîşê piştdayîş bidê înan. Her keyeyêke parçeyêke nanê xo wa bi wayêkî û biranê xo dir pare bikero. Wa çar parçe bibê yew û piştdayîş bidê yewbînan."

 

'Ez werd viraznena û ez do înan rê bieşrawî'

 

Mecbûre Kaçake zî bale ante serê erdlerzî û va: "Ez şarê ma rê derbazbîyayîş wazena. Bi rastî ma zaf xemgîn bî. Erdlerzêke zaf pîl ame meydan. Nika tena destê ma ra çîyêk yeno. O zî ma werd û awe xo erdlerzan dir pare bikerê. Ez do werd amade bikerê û înan rê bieşrawî. Çiqas destê ma ra yeno ganî ma bikerê û semedê hetkarî ma amade bê. Şarê kurdî her wext cîrananê xo rê û kesê ke kewtê tengasî hetkarî kerdê. Ma çar parçe semedê wayê û biranê xo yê erdlerzî rê bibê hetkar. Heta nika ma xêrê dewletan rê nêameyê na merhela, ma bi kede xo û hetkarîya ke dayo destpêkerdiş, ma ameyê na merhela. Senîn şarê Başûrî erdlerz de ma rê hetkarî kerd ma do zî wina erdlerzê Başûr û Rojhelatî dir bibê hetkar."

 

'Bi viraştişê puncan ma do destek bidê'

 

Maya Aşitîye Zekîye Kaya zî da zanayîş ke ê zî sey Mayê Aşitî do hetkarî bikerê û wina va: "Ma semedê erdlerzê ke virazya zaf xemgîn a. Gerek ma semedê erdlerzan bibê hetkar. Ma bi viraştiş û rotişê puncan eşkenê bibê destek. Semedo ke eynî çî ame sereyê ma. Taybetî zî şarê kurd bibê hetkar."

 

'Ma do her wext destek bidê'

 

Cinîya bi nameyê Dirê Cîntane zî ard ziwan ke semedê erdlerzan do taxe ra hetkarî kom bikerê û wina va: "Heme dewletî bêveng ê, ti hetkarî nêdanê erdlerzzedeyê kurdan. Uca de merdimayî miren o. Semedo ke kurd ê, medyaya tirkan qet nêard rojeve. Ma cinî ma do taxa xo de, semedê hetkarî çi destê ma ra bêro ma do bikerê. Lazim o kesêke erdlerzzedeyan tena nêverdo.