AMED - Erdlerzê Başûr û Rojhelatê Kurdistanî de virazya, bi seyan kesî cuya xo vinî kerdî û bi hezaran kes zî birîndar bî. Hemsereka Odeya Tabîban ê Amedî Selma Guzele derheqê erdlerzî de wina va: "Ma semedê her tewir piştdayîşî û destekî amade yê."

 

Erdlerzê ke merkezê ey Silêmanî, Halepçe û Kirmaşan de Başûr û Rojhelatê Kurdistanî de virazya, hûmara kesê ke cuya xo vinî kerdî resa  530 û 7 hezar û 817 kes zî birîndar bî. Bi hezaran keyeyî rijyayî û xeylê keyeyî bê keye mendî. Hemsereka Odeya Tabîban ê Amedî Selma Guzele derheqê babete de va înan ekîbê xizmetê weşî awan kerdê û ard ziwan ke derheqê lazimîyê sereyîn de zanayîşê înan çin o no semed ra bendeyê waştişî yê.

 

'Hemverê heme îhtîmalan ma ekîban amade kenê'

 

Selma da zanayîş ke erdlerz de xeylê kesî cuya xo vinî kerdo û nê çî ardî ziwan: "Hûmara merdan û birîndaran tam zelal nêbîyo. Goreyê ma zanayîş Iraq ra girewto, zêde kesî cuya xo vinî nêkerdo. La bi Îran dir ma nêkewtî têkilîyêke baş. Bi hemkarîya sazgehê fermîyan ra ame dîyarkerdiş ke Enqere ra AFAD û UMKEyî ekîbêke eşrawitê. Ma bi Mudîrîyê Weşîya Merkezê yê Amedî dir pêvînayîş kerd. La înan va ke, ti waştêke înan ma rê çin o. La ma her îhtîmal ekîbê xo danê vindernayîş."

 

'Problemê girîng şert û mercê zimistanî yê'

 

Selma dewamê qalîkerdişê xo de ard ziwan ke ê amadeyê şêrê mintiqa û wina va: "Ma semedê her tewir piştdayîşî amade yê. Mintiqaya erdlerzî de ma nê zanê ke lazimî bi çi esto. Ma bi hemkarîya şima veng danê. Eke lazimî esto, ma rê xebere bidê. No tena hetê weşî de nê. Ma zanê zaf lazimî estê. En girîng zî şert û mercê zimistanî yê. Semedê piştdayîşî ma lîsteya xebatkarê weşî amade kerdê. Wexto ke lazimî bibo ma eşkenê şêrê."