Rûken Goman

 

DÊRIK - Cinîya Kurde bi nameyê Tolayi Ketime ke, Pirsûsê Vakurê Kurdistanî ra ya, hetê mêrdeyê xo ra bi zor û bi tehdîdan teslîmê DAÎŞî amîbî kerdiş. Tolayi Ketime dimayê ke çeteyê DAÎŞî ra xelisya hîkayeya xo qalî kerde.

 

Tarîx de timûtim zîhnîyetê camêrdan waşto ke, îqtîdarê xo serê cinîyan de dewam bikerê. Cinî her wext bi tehdîtkerdiş, bi kiştiş û bi tedayê psîklojîyê hetê camêrdan ra rî bi rî mendî. Cinîya Kurd Tolayi Ketime zî sîstemê îqtîdarê camêrdan bi serran o, bi tedayê psîklojîk û bedenî rî bi rî mende. Tolayi emrê xo yê 14 serre de amî zewicnayîş û wayîrê 3 domanan a. Mêrdeyê Tolayî, aye û domana aye kerdî mîyanê DAÎŞî. Tolayî bi hemleyê xelisnayîşê Reqa çeteyê DAÎŞî amî xelisnayîş. Tolayi hîkayeya domanîya xo bi dejî winî arde ziwan.

 

'Pîyê mi mi rew zewicna'

  

Tolayi wina dest bi hîkayeya xo kerde: "Wexto ke emrê mi 6 serrî bi pî û maya mi fek yewbînan ra vera dayî. Pîyê mi qet nêverda ke ez şîrî maya xo bivînê. Heta roja ewro mi maya xo nêdîya. Emrê mi 14 serrî de pîyê mi ez bi camêrdêke Tirkî dir zewicna. Pîyê mi waşt mi ra xelas bibo no semed ra mi emrê qij de zewicna."

 

'Mêrdeyê mi bi tehdîd û zorî mi û domananê mi kerd mîyanê DAÎŞî'

 

Tolayî hîkayeya xo winî qalî kerde: "Mêrdeyê mi kesêke zaf xirab bi, cuya xo de her wext têkilîyê ey bi qorîcîyan dir bi. O bi xo hetgirê dewlete bi. Wexto ke newe DAÎŞ vejya winî va: "Ma şêrê mîyanê DAÎŞî." Xora verê zî telefon û televîzyon mi rê qedexe kerdib û mi tehdîd kerdêne û wina va: "Eke ti mi dir nêrê mîyanê DAÎŞî zî ez do domanan bigîrî û şîrî." Semedo ke domanê mi qij bî ez mecbur menda ke pêwa mêrdeyê xo şîrî."

 

'Mi verê DAÎŞî de zahf zor û zehmetî ant'

 

Tolayi dîyar kerde ke aye mîyanê DAÎŞî de zehmetî anto û wina va: "Wexto ke ma kewtî Sûrîye vernê de ma berdî Bajarê Tebqa. Mîyanê DAÎŞî de ez bîya şahidê zaf hedîseyê wehşî. Mêrdeyê mi şîne semedê DAÎŞî şer kerdêne û 10-15 rojan reyke ameyne keye. Ez û domanê xo tena mendêne. Ma zereyê keyeyî de zaf zehmetî derbaz kerd. Heta serrî û nîm ma Tebqa de mendî, dima ra înan ma berd mintiqaya Meyadîn ê Dêrazorî. Wexto ke şerê Reqa dest pêkerd, dimayê 3 aşman xebere kiştişê camêrdê mi ame. Bi nêzdîyê 2 aşmîyo mêrdeyê mi Reqa de ameyo kiştiş."

 

'Ez çeteyan ra remawa û resaya şerwanê QSDî'

 

Tolayi da zanayîş ke wexto ke mêrdeyê aye ameyo kiştiş, aye hewl dayo ke çeteyan ra bixelisîyo û wina va: "Her ke ez remayne, çeteyan ez girewtêne. En peynî ez resaya mîyanê sîvîlê Reqa. Şerwanê QSDî ma çeteyan ra xelas kerdî û ez azad bîya."

 

Waştişê Tolayi o yo ke ageyro verê maya xo û ê rojê tarî xo vîr ra bikero.