Medîne Mamedoglu

 

MÊRDÎN - Mewludeya ke îşkence ra birînê bedenê aye ke estê, dest xoverdayîş ra vera nêdana û vana ke waştişê aye sereyîn o yo ke tecrîdê serê Rayberê PKKî Abdullah Ocalanî ganî bêro wedartiş û azad verdê.

 

Dimayê tespîtê Abdullah Ocalanî yê "Kurdistan mêtingeh o" xoverdayîşê ke ame destpêkerdiş vila bi. Kesê ke en zaf xo ver dayî cinî û mayê kurdan bî. Nê mayêke ke semedê ziwan, kultur û aştîye vejyayî rayîr reyan ameyî tepiştiş, reyan ameyî kiştiş û reyan ameyî girewtiş û îşkencekerdiş. Cinîya ke nika Mêrdîn de semedê azadîya Rayberê PKK Abdullah Ocalanî 54 serrîya xo de kewta grev Mewlûde Çelebî zî yew nê cinîyan ra ya. Mewlude wina vana: "Heta ke Rayberê ma azad nêbo cinî azad nêbenê."

 

Hepisxane ra ver bi qedexekerdişê Cizîre ra...

 

Mewlude dimayê serrê 98an, serra 2008 de reyna kewte hepisxane, 6 serrê xo hepisxane de derbaz kerde. Mewlude wextê qedexeyê Cizîre de qet keyeyê xo terk nêkerd û dimayê aşmêke bi zor taxa ke tede niştêne ro amî vetiş.

 

Mewluda ke vana "Se beno wa bibo, ganî ma nêvinderê", nika semedê grevê ke beşdar bîya wina vana: "Ma semedê çalakî erey mendî. No prosesî de çîyê zehmetî ameyî cuyayîş û nêheqî merdiman rê amî kerdiş. Merdiman erzenê hepisxaneyan. Merdimî nêeşkenê fikrê xo bîyarê ziwan. Heme cayen de şer esto. No şero ke esto en zaf ma dejneno. Eke ma nika xo ver nêdê, ma do key xo ver bidê?"

 

'Heta peynî ma do waran de bê'

 

Mewlude ard vîr ke çareserî gamêke dûrî ma ya û wina va: "Eke berayê Îmralî bêro akerdiş, do her kes bieşko rehet nefes bigîro. Semedê azadîya Rayber Apo ke do şarê kurdî heme çî bidê verê çimanê xo û têkoşîn bikerê."

 

Mewlûde ard vîr ke Ocalan semedê înan xeta sûr a û wina qalî kerde: "Waştişê ma cinîyan o yo ke, ganî tecrîdê serê Rayberê ma bêro wedartiş û azad bibo. No semed ra zî ma do heta peynîî xo ver bidê û waran de bê."