WAN - Tecrîdo ke Rayberê Şarê Kurd Abdullah Ocalanî ser de yeno meşnayîş, dewam keno. Seke yeno zanayîş verê cû ser medyaya komelkî de derheqê mergê Ocalanî de tayê xeberî ameybî vilakerdiş.

 

Vera nê xeberan de kurdî û dostê kurdan çend hewte yo ke payan ser de yî û çalakîyan virazenî. Babete ser o Endama MYKyî ya HDPyî Semra Demîre qisey kerde û vînayîşê xo arde ziwan. Semra va ‘wexto ke pêvînayîşî bîyêne Ocalanî dîyar kerdbî beno ke pêvînayîşê peyênî bibî û eke wina şêro do pêvînayîşî bibiryî’ û wina domnaye: “No zî yeno manaya kûrbîyayîşê şerî.”

 

Semra dewamê qiseykerdişê xo de va ‘şarê kurd Ocalanî sey rayberê xo vîneno’ û wina dewam kerde: “Heta nika yê ke tewr zaf aştîya Tirkîya de rol girewto xo ser Abdullah Ocalan o. Vera nêyî de dewlete hertim bi hawayo nêcîddî nizdî bîya. Ganî dewlete xeberê ke medyaya komelkî ser o ameyî parekerdiş, ercan nêvîno. Xeberê negatîfî beno ke kaosêko gird bivirazî. Çimkî Birêz Ocalan binê tecrîdêko girankerde de yeno cuyayîş. Her ke şono etirîyayîşê şarî zêde beno. Ocalan heme heqanê xo ra mehrum yeno verdayîş. No het de her kesê ke zerrîya ci seba aştîye erzena, etirîyayîşê ci zêde beno. “

 

Wa wezîfe bigirî ser mile xo

 

Semra dîyar kerde ke seba demokratîkbîyayîşê Tirkîya û çareserîya probleme kurdî ganî Abdullah Ocalan esas bêro girewtiş û wina va: “Eke nê wazenî, ganî berpirsîyarî bigîrî  mile xo ser. No şer û kaos saya îqtîdarî de benî. Wa baş fam bikerî ke êdî bi nê kerdişan û bi nê polîtîkayan netîce nêgênî. Tecrîd tena Ocalanî ser de nê, ser şarê kurd de zî yeno meşnayîş. Ganî keye, avûkat û heyet Ocalanî reyde pêvînayîş bikerî û derheqê rewşa Ocalanî de melumat bêro dayîş. Azadîya Ocalanî, azadîya ma cinîyan a. Eke nêwazenî kaos gird bikero, ganî pêvînayîşê înan dewam bikero.”