Medine Mamedoglu

 

ŞIRNEX - Şirnex de dimayê qedexeyê tebervejyayîşê kuçeyan, rijnayîş û talankerdiş kerdî cuyayîş, bi înşatê TOKÎ dewam keno. Hemsereka HDPî yê Şirnexî Zeynep Onate dîyar kerde ke dewlete wazena Şirnex bi TOKÎyan teslîm bigîro û wina va: "La merdimî reyna xo ver danê. Hemverê pêrodayîşan, bomban xo ver dayî. Nika zî hemverê TOKÎyan xo ver danê."

 

Şirnex de dimayê qedexeyê tebervejyayîşê kuçeyan de rijnayîş û talan dewam kenê. Eynî wextî de înşaatê TOKÎ dewam kenê do 6 hezar awanîyê TOKÎ bêrê viraştiş.

 

7 taxan de xebatê TOKÎ

 

Netîceyê pêrodayîşan de 2 hezar keyeyî çin bî. Nika înşaatê TOKÎ nê taxan de dewam keno. Hemsereka HDPî yê Şirnexî Zeynep Onate dîyar kerde ke 7 taxan de TOKÎ dewam kenê û hewl danê ke şarî yew tîp keyan de bi ca bikerê. Zeynepe dewamê qalîkerdişê xo de wina va: "Wazenê bi no hawa, têkilîyê komelî û kulturî bivuryê. Merdimî pêrodayîşan de heta nika di serrî yo yenê mexdurkerdiş.

 

Zeynepe ard ziwan ke no prosesî de bi hezaran hemwelatî bê keye mendê û pereyê şîyayîşê kîrayê hemwelatîyan nînî dayîş û wina va: "Keyeyê hemwelatîyan ke bi kedêke pîl viraştî, talan kerdî. Bi sebebê pêrodayîşan, keyeyî ameyî rijnayîş. Amancê no rijnayîşî o bi ke koçberî bi ca bîyarê. Merdimî her şert û mercî de mexdûr kerdî. Merdimî hemverê pêrodayîş, bomban xo ver dayî û nika zî hemverê awanîyê betonan xo ver danê. La do şar teslîmê TOKÎyan nêbo."