‘Zeynep Turgut

WAN - Kurdîstan de her kulturêke wayîrê tarîxî yê û awankerdişê kanî yo. Dewa kergezî Maya Feleke destûr nêdana kulturê rêşta vinî bibo û her punce û kîlîme bi hunerê rêşta viraznena. Maya Feleke ard ziwan ke kulturê rêşta awankerdişêke cinîyê kurdan o û va ke cinîyê kurdî bi rêşta cuyayîş munayê.

Tarîxê Kurdîstanî de cinîyan her wext awankerdişê tarîxî berardiş bi ca ardê. Yew ci ra zî kulturê rêşta yo. Rêşta tarîx û kulturê kurdan de bi taybetî zî semedê cinîyê kurdan taybetmendîyêke gird a. Cinî verî ra heta nika bi rêşta ra nexşê en weş virazenê. Kurdistan de rêşta bena awankerdiş û kulturê cinîyan. Hema zî dewê Kurdîstanî de cinî bi rês puncan û nexşê xo yê ke rêşta rêsnenê viraznenê.

'Rêşta munayîş û awankerdişê cuya min a'

Dewa ke girêdayê qezaya Qelqelî dewa Kergezî maya bi nameyê Felek Tûrkoglu (80) destûr nêdana ke kulturê rêşta vînî bibo û dîyar kerd ke rêşta semedê cinîyê kurdan manayêke pîl o û va ke aye nêwazena kulturê rêşta bibo vinî û wina va: "Cinîyê kurdî awankerdox ê. Rêşta cinîyan awankerd a. Demê verînan de cinîyan heme berardişê xo bi rêşta kerdê. Rêşta semedê ma cinîyan manayêke pîl a. Mayê ma bi rês heme çî bi rêşta viraştêne. Rêşta semedê ma hem debare hem zî manayêke cîya bî. Ma bi rêşta puncê rês, kîlîm û her çî ra nexş viraştêne. Verê ra wexto ke ma rêsta rêsnayne ma cinî kom bîne û bi klaman bi rêşta puncan viraştêne. Cuya ma zaf weşbî. Rêşta kulturê maya ma bî. Mayê ma ra ma rê mîras mend. Awankerdişê mayê ma zaf xurt û mende bi. Kulturê rêşta tena Kurdîstan de esto. La nika no kultur vinîkerdişî dir rî bi rî yo. Ez nêwazena no kultur vînî bibo, no semed ra ez no emrî de zî bi rêşta puncê rêsînan viraznena. Reyan ez zehmetî ancena zî la ez reyna fek rêşta ra vera nêdana. Rêşta munayîş û awankerdişê cuya min a."

'Kesê ke kulturê xo vinî kenê ti cîyayîyê înan merdişî nêmaneno'

Feleke en peynî ard ziwan ke aye rêşta ra kêfweş bena û va lazimo cinî awankerdişê xo wayîr vejyê û qiseykerdişê xo winî qedêna: "Ganî ma qedir û qîmetê kulturê xo kan bizanê. Ez bi rêşta tena punc nêviraznena ez cuyêke awan kena. Ez her roje bi rêşta puncê rêsînan viraznena. Cinîyê dewe yenê derûdorê mi kom benê. Ma pîya sohbet kenê. Reyan mi ra vanê, fek ci ra vera de, çimê to kor bê. La ez kesî goşdarî nêkena. Kesê ke kulturê xo vinî keno o wext ferqê înan merdan dir nêmaneno. Nê taybetmendîyê ma wayîrê tarîxêke pîl ê. No zî kulturêke cinîyê kurdan o. Lazimî esto ma destûr nêdê kultur û adetê ma vînî bibê."