Safiye Alagaş

 

AMED - Nazîme Yureka ke hîrê doman û tornêke aye hepsîyê, çîyê ke cuyaya bi hesîrê çiman qalî kena. Nazîme semedê xemgînî nêzana domanê aye kam roje bi telefon geyrenê û heta reyan zî nameyê xo kena xo vîr.

 

Nazîme Yureka yew mayêke serê na cografya de xeylê dej antê û semedo ke hîrê doman û tornêke aye tewqîfkerdeyê travma cuyena.

 

Lajê aye Kenan Yurek hepisxaneyê Tîpê F yê Kandira de yo û cezaya muebetî girewto. No 18 serrî yo hepisxane de yo. Lajê aye Ertan Yurek zî hepisxaneyê Tîpê F yê Bolu de yo. Kêna aye Candan Yureke zî hepisxaneyê Tîpê M yê Gebze de ya û 7 serrî yo hepisxane de ya. En peynî zî tornê aye Cotkar Yurek 4 aşmî verê ameyo tepiştiş û nika hepisxaneyê Tîpa D yê Amedî de yo. Nazîme dîyar kerde ke semedo ke hepisxaneyî dûrî, nêeşkena domananê xo bivîno û waşt ke domanê aye sewqê Amedî bêrê kerdiş.

 

'Hîrê serrî ez nêşîya pêvînayîş'

 

Nazîme dîyar kerde ke hîrê serrî nêşîya pêvînayîşê lajê xo Ertan û va emsar şîya û va surgunkerdiş û eşrawitişê cayê dûrî îşkenceyo. Kêna aye Candan zî nêweşa astîmî ya. Semedo ke hawayê Gebze bi nem o, dem bi dem krîz derbaz kena. Nazîme wina va: "Lajê kêna mi 15 serre yo. Serrêke de 3 rey ame tepiştiş. En peynî ame tewqîfkerdiş. Kêna mi her ke musena krîz derbaz kena. En peynî wexto ke ame tepiştiş zî şekirê ci bî zêde. Semedê şekirî hepisxane de mende. Doktorî va nêweşa Koahî ya. Ma waşt kêna mi bêro Amed. Ma bi desan rey waştişname da. Hawa halê kêna mi giran keno. La cewabêke pozîtîf nêdayî waştişnameyan."

 

Nazîme bale ant serê travmayê ke cuyena û dîyar kerde ke her hewte domanê aye bi telefon geyrenê la rojanê înan nêzana û va reyan aye nameyê xo zî xo vîr ra kena.