Zeynep Turgut

COLEMÊRG - Dimayê pêrodayîşan ra Gever de bi seyan teqnayîşî ameyê meydan. En peynî hewteyê derbaz bi de 2 domanî birîndar bî, yew zî cuya xo vinî kerd. Cinîyê Geverî nêrazîbîyayîşê xo nêpakkerdişê bombayan dayî û vatî ke domanê înan êdî tersenê kay bikerê.

Gever de dimayê pêrodayîşan heta nika bi seyan teqnayîş bi ca ameyê û bi ti hawa hetê dewlete ra vernîye ci nîno girewtiş. En peynî teqnayîşê 30ê Êlule qezaya Colemergî Gever de Taxa Firatî de 2 biray birîndar bîbî. Di birayan ra Umet Kozayo 5 serre cuya xo vinî kerd û Erhan Kozayo 6 serre zî semedê dermankerdişî wedarnayî Nêweşxaneyê Dewlete ê Geverî. Kozay dima ra sewqê Nêweşxaneyê Wanî ame kerdiş. Cinîyê Geverî reaksîyon hemverê nê çîyan dayî û vatî êdî domanê înan tersenê kay bikerê.

'Êdî domanê ma tersenê kay bikerê'

Cinîya bi nameyê Gûlê Polat ard ziwan ke înan rê heme çî ameyo qedexekerdiş û va ke bi nê kerdişan dewlete dişminîya xo mojnena ra û wina va: "Pêrodayîşan de bi tanq û topanê xo zulmê xo serê ma de kerdî. Cuyayîş ma rê heram kerdî. Keyeyê ma rijnayî û veşnayî. Serrêke derbaz bi, la hema birînê ma sey vizîrî ganî yê. Dewlete her wext rîyê xo yê sîya mojnena ma. Hewteyê derbaz bi de wexto ke 2 biran pîya kay kerdêne teqnayîş ame meydan. Yew cuya xo vinî kerd. Ma zaf xemgîn bî. Nê bombayan pak nêkenê. Ma nêzanê nika bomba ça de estê. Êdî domanê ma tersenê ke kayan kay bikerê. Heme çî ma rê qedexe kenê. Asayîşê domananê ma çin o. Ma êdî nêeşkenê domannaê xo bieşrawê mekteban, nêweşxaneyan û kuçeyan. Bi zanayîş bomba nînê pakkerdiş. Ganî nê çî qebul bikerê. Semedo ke domanê binî zî nêmirê vernîye nê çîyan bigîrê."

'Domanê ma tersan ra êdî nêeşkenê azad bigeyrê'

Maya Gulçîn Karaburk zî ard ziwan ke şarê Geverî yenê cezakerdiş û va êdî nêwazenê merdiş bivînê û wina va: "Serê şarê kurdî de zulm yeno kerdiş. Bi zanayîş bomban pak nêkenê. Par ra heta nika senîn hema zî nêameyê pakkerdiş. Dewlete eşkena pak bikero. Şarê Geverî her wext xo ver danê û do xo ver bidê zî. Lazim o ke hema bomba nêameyê teqnayîş bêrê pakkerdiş. Zulm bibo nêbo zî ma do xo ver bidê. Hewteyo derbaz bi 2 biray birîndar bîç Yew bira cuya xo vinî kerd û yew zî nêweşxane de yo. Ganî nê çî nêrê qebulkerdiş û êdî domanê ma bêters kayan kay bikerê."

'Verê kiştişê domanan de manaya cuyayîşî çi maneno?'

Amîna Oztaşe zî ard ziwan ke ê wazenê merdişê domanan peynî bê û va ke ganî kes destûr nêdo domanî biters pîl bê û wina dewam kerde: "Hêvîya ma hemverê azadî qetî vindî nêbena. Heta nika ma ende vindîbîyayîş dî, ende rehet nîyo merdim fek xoverdayîşî ra vera bido. Dewlete ma musnawa merdiş. Ma nêwazenê her roje çimê xo bi merdişê kesêke akerê. Gunayê domanan çî yo? Çira vernîye nê çîyan nîna girewtiş. Domanê ma ameyoxê ma yê. Verê merdişê domanan de çi manaya cuyayîşî maneno? Ma wazenê azadî û aştî bêro."