Sorgul Şêxo

 

REQA - Şerwanê YPJî ke xoverdayîş û têkoşînê  Reqa de cayê xo girewtî dîyar kerdî ke ewro rojê tarîxî cuyenê û xoverdayîşê şerwanê YPJî û QSDî rîpelê tarîxî de bêrê nuştiş.

 

Dimayê xoverdayîşê ke bê hempa Reqa temamî ame xelisnayîş, êdî tarîtîyê DAÎŞî peynî bi û merdiş açerya cuyake rengîn. Şerwanê YPJ/YPGî û hêzê QSDî hewn û xeyalê DAÎŞî peynî kerdî. Hêvîye cinîyan newe ra ganî kerdî. Şerwanê YPJî ke cayê xo xoverdayîşê Reqa de girewtîbî ewnîyayîşê xo bi Ajansê ma yê JIN NEWSî dir pare kerdî.

 

Rojbîn Dêrazora ke bi xo Dêrazorî ya û cayê xo hemleyê tarîxî yê xelisnayîşî Reqa de girewta hîsê xo ardî ziwan: "Ewro kêfweşîye ma û heme şerwanan, vatiş qîm nêkeno ke bîyaro ziwan. Semedo ke ma bedelê giran ê Reqayî destê DAÎŞî ra xelisnayî. DAÎŞî rew bi rew cayê xo vera nêdayne, la îrade û hêzê ma xurt bi û ma bi amanc û sozê xo bi ca ard. Ez na bawerî da ke senîn Reqa ame xelisnayîş, do Dêrazor zî bêro xelisnayîş."

 

Hewnê mi yê azadî bi ca ame

 

Zîlan Kerama zî verê 7 aşman hetê şerwanê QSDî ra amebî xelisnayîş, nika cayê xo xelisnayîşê Reqa de gêna hîsê xo winî ard ziwan: "Yew zî hewnê mi bi ke ma Reqa azad bikerê. Nika zî no hewnê min ê azad xêrê şerwanê xoverdayîşam bi ca ame. Ma no xelisnayîşî diyarî heme şarê Reqa kenê."

 

Ma do têkoşînê xo dewam bikerê

 

Hewr û Zenûbî endama Hêzê cinîyan ê Suryanî (Beyt Nehrên)  ke aye zî cayê xo hemleyê xelisnayîşê Reqa de girewtebî, hîsê xo winî ard ziwan: "Wehşetê DAÎŞî ke Reqa de bi ca ardêne, ewro peynî bi. Xêrê şerwanê têkoşeran êdî Reqa azad a. Ma do têkoşînê xo dewam bikerê."

 

Ma hîna bi hêz bî

 

Zîlan Dîlbere ke destpêkê hemleyê xelisnayîşê Reqa de ca girewtebî zî kêfweşîye xo winî ard ziwan: "Her çiqasa ma rastê zehmetîyan ameyî zî, ma fek têkoşînê xo ra vera nêda û moralê xo nêfîna. Ma hîna bi hêz bî, ewro zî netîceyê xoverdayîşê Reqa ame meydan. Xelisnayîşê Reqa heme cinîyê dinya rê bi taybetî zî cinîyê Reqa rê pîroz bo."