REQA - Klara Reqa, serê xelisnayîşê Reqa de şîroveyê girîng kerdî.

 

Dimayê xoverdayîşê şerwanê QSD'ê, YPG'ê û YPJî bajarê Reqa bi temamî ame xelisnayîş. Êdî nika boye azadî Reqa ra yena. Derheqê xelisnayîşê Reqa de Fermandara Yewîneyê Pawitişê Cinî û qordîneyê ke şerê Reqa rayîra berdêne Klara Reqa, xelisnayîşê Reqa şerwanan rê, şar û cinîyan rê pîroz kerde.

 

Klara Reqa, xelisnayîşê Reqa destpêk de awankerdişê cuya azad û demokratîk Rayberê PKKî Abdulah Ocalanî û heme pekrewanê azadîyê ke oxirê azadîya Reqa de şehîd bîyê, pîroz kerde.

 

Reqa de nika prosesêke tarîxî yeno cuyayîş!

  

Klara dîyar kerde ke hemleyê Reqa de her çiqasa zehmetî ame cuyayîş zî la nika Reqa azad a û wina va: "No zî bi xoverdayîş û kede cengaweran virazya. Ma çiqasa qalê cengawerîya înan bikerê zî kêm maneno.  Êdî vatiş qîmê nê xoverdayîşan nêkeno. Xeylê rey Dewleta Tirkan û hemkarê aye waştêne ke Reqa asteng bikerê la bi ser nêkewtî."

 

Manaya Reqa girîng a! 

 

Klara dewamê qalîkerdişê xo de bale ante serê girîngîyê Reqa û wina va: "Dinya de bajarê Reqa sey kelaya zulm, seretirakerdişê merdiman, destdergkerdişê serê erjê cinîyê pîroz amebî naskerdiş. No semed ra xelisnayîşê Reqa girîng bi."

 

YPJî heyfê kesê ke dişminîyê cinîyan kerdêne girewtî!

 

Klara dîyar kerde ke şerwanê YPJî bedelê giranan Reqa xelisnayî û wina va: "Êdî YPJî dinya de îspat kerd ke cinî eşkenê bi hêz û îradeyê xo pawitişê xo bikerê û xo bi rêxistin bikerê. Ma bi hemleyê xelisnayîşê Reqa de heyfê kesê ke dişminî cinîyan rê kerdêne girewt."

 

Reqa bi destê cinîyan amî xelisnayîş

 

Klara qiseykerdişê xo wina dewam kerde û va: "Cinîyan rayberîya hemleyê xelisnayîşê Reqa kerdî û Reqa bi destê cinîyan amî xelisnayîş. No zî sey xencerêke gina qelbê DAÎŞî ro. Ewro cinîyan heyfê xo DAÎŞî ra gênê. Şerwanê Êzîdî zî bi ruhê heyfgirewtişî beşdarê şerî bî. Verê heme zor û zehmetîyan de zî, dîmenê înan ke ameyî remnayîşî verê çimê înan de gane bi. Cinî bi ruhêke netewî komelî pawena."

 

Klara, peynîye qalîkerdişê xo de wina va: "Sazgehê komelê Reqa û milê ê pawitişî bi rayîrê meclîsê Sivîl yê Reqa bêro awankerdiş. Ewro bi xelisnayîşê Reqa de hewn û xeyalê embazê ke oxirê xelisnayîşê Reqa de şehîd kewtî, virazya. Ma sozê awankerdişê komelêke demokratîk û federalîyê Vakurê Sûrîye danê."