Fîlîz Zeyrek

 

EDENE -Edene de taxê Kurdan hema hema her roje polîsî erzenê ser. Cinîyan da zanayîş ke polîtîkayê hemverê taxê Kurdan bi amancê ke şar bitersnê caardilan kenê û vatî semedo ke Kurd ê rastê nê polîtîkayan yenê.

 

Rojo ke OHAL ameyo îlankerdiş heta nika zaf îhlalkerdişê heqan ameyî cuyayîş û rojêke verê bi qerarê ke Heyetê Asayîşê Neteweyî ameyo girewtiş OHAL reyna ame dergkerdiş. Edene ke nifûsê Kurdan zêde yo, hema hema her roje erzenê serê taxê Kurdan û bi desan kesî yenê tepiştiş. Kuçeyê ke hetê dewlete ra hedef yenê girewtiş zî nê yê: Gulbahçesi, Daglioglu, Kuçuk Dîkîlî, Barbaros, Denîzlî ke nê kuçeyî heme girêdayeyê qezaya Seyhanî yê. Mîyanê nê kuçeyan de, kuçeyê 19 Mayisî girêdayê qezaya  Yuregirî zî esto. Cinîyan hemverê no halî reaksîyonê xo mojnayî ra û dîyar kerdî ke bi tedeyan wazenê şar bitersnê.

 

'Tupe akerde verdabî û şîyê'

 

Operasyonê hewteyê verî ke merkezê Edene ame kerdiş de 34 kesî ameyî tepiştiş û eştibî serê keyeyan. Meryem Aka dîyar kerde ke eştê serê keyeyê maya aye 60 serrî û wina va: "Bi zor kewtê keye. Tupe mitbaxî akerde verdabî. Heme keye û dikan serûbin kerdibî. Ma wextê ke derg nêkewtî zere. No çîyê ke bi zanebîyayîş amebi kerdiş. Eke tupe biteqyayne ma heme merdêne. Maya mi 60 serrî ya. Gelo çi zirarê aye resayo înan. Nê çîyê ke ameyê kerdiş dişminîyê hemverê Kurdan nîyo o wext çîyo?"

 

'Wazenê bi tedayan bêveng bikerê'

 

Cinîya bi nameyê Gaysa Sunaye zî dîyar kerde ke hema hîrê merdimê aye tepişnayeyê û wina va: "Êdî huzûr nêmend o. Bi tedayan hewl danê ke ma heps bikerê. Ma bêveng verdê. Wexto ke ameyî bêşînge bebike zî serûbin kerdî. Heqeret ro ma kerdî. Her roje nê zulmî taxan kenê. Şarî rê huzûr nêverdayî. Semedo ke ma Kurd ê nê çîyan  anê sereyê ma."

 

'Ma êdî nêtersenê'

 

Fadîle Akgule zî ard ziwan ke şefeqê siba de eştê serê keyeyî, heqeret kêna aye kerdê û tepiştê. Fadîle qiseykerdişê xo wina qedêna: "Ma polîtîkayê bêvengverdişî veng vet. Bi zulm nêeşkenê biresê cayêk. Ma bodruman de ameyî veşnayîş, cenazeyê ma kuçan de mendî. Bedenê ma ameyî teşhîrkerdiş. Domanê ma verêke ma de merdî. Ma hema çi vajê? Ma êdî çîyêk ra zî nêtersenê."