Zeynep Turgut / Dîlan Babat

MÛŞ - Xebatê neteweyîya kurdistanî rayberîya Kongreya Neteweyîya Kurdistanî (KNK) de dewam kenî. Yewîya neteweyîya kurdan xo sey lazimîyêka tarîxî dana ferzkerdiş. Polîtîkayê dewletan yê ke dişmenîya cinîyan kenî yewîya neteweyî de mîsyonê cinîyan ano vîrê merdimî.

Cinîyê kurdê elewîyî yê ke qezaya Gimgimî ya Mûşî de cuyenî derheqê yewîya neteweyî ya kurdan de qisey kerdî. Cinîyan ra Akîde Aslane va ‘yewîya neteweyî pratîkê vindarnayîşê zulmo ke kurdî bi serran o cuyenî ya’ û wina dewam kerde: “Yewîya neteweyî hem azadîya şarê kurdî ya û hem zî hêvîya pîya cuyayîşê cinîyê kurd, elewî û heme bindestan a. Ma wazenî ke fikranê xo bi hawayo azad îfade bikerî de bicuyî û nika seba ma toximê hêvîye keske beno.”

Ganî ma destek bidî yewbînan

Cinîya bi nameyê Şengul Çîçeke dîyar kerde ke wazenî sey şarê kurdî elewîyan zî bigîrî binê kontrolî û wina va: “Ganî ma seba yewîya neteweyî pîya hereket bikerî. Heqê ma esto ke ma çar parçeyê Kurdistanî bikerî yewe û xo bi xo qederê xo tayîn bikerî. Ma do nîşan bidî ke heme şarî bi yewîya neteweyî eşkenî pîya bicuyî. Ganî ma cinîyî û kurdê ke Tirkîya de cuyenî ganî ma yewîya neteweyî fam bikerî û bidî famkerdiş. Ganî ma seba yewîya neteweyî destek bidî yewbînan.”

Hedîye Ekîncîye zî va ‘eke yewîya neteweyî bêro awankerdiş, do seba şarê Başûrê Kurdistanî zî bibo hêvîyêkî’ û wina domnaye: “Referandûmê xoserîye heqêk o labelê seba kurdan çîyêko hêvî dana yewîya neteweyî ya. Ganî seba yewîya neteweyî ma heme bibî dest bidî destê yewbînan.”