Dîlan Babat / Hîkmet Tunç

WAN- 5ê Nîsana 2011î ra nata bi mehneyê ‘muxalefetê hewayî’ û ‘keştî xirabe ya’ Rayberê Şarê Kurdî Abdullah Ocalanî reyde pêvînayîşî yenî astengkerdiş. Badê ke Konseyê Caardişî yê KCKyî 3 rojî verê derheqê weşî û ewleyîya Ocalanî de îzehetêkî da, heme dinya de kurdî vejîyayî raşteyan û tecrîdî protesto kenî.

Tirkîya de zî Tevgerê Cinîyanê Azadan (TJA) bi kampanyaya ‘Tecrîd do vînî bikero, azadî do qezenç bikera’ xebatê taxe û ziqaqan dewam keno.

Babete ser o Parlamentera HDPyî ya Stenbolî û Endama Heyetê Îmrali Pervîn Buldane qisey kerde. Pervîne dîyar kerde ke ê proseso ke tewr zaf lazimî bi fikre Ocalanî esto de cuyenî û ganî cinîyê wayîrê Rayberê xo bivejyî.

Reaksîyonî qîm nêkenî

Pervîne va ‘wedarnayîşê tecrîdî seba şaranê Tirkîya do feydeyin bo’ û wina dewam kerde: “Wedarnayîşê tecrîdî de bitaybetî cinîyan rê wezîfeyêko gird keweno. Wedarnayîşê tecrîdî seba çareserîya problemê kurd û demokratîkbîyayîşê Tirkîya zî muhîm o. Ewro tay bo zî tayê reaksîyonî estî, labelê nê reaksîyonî qîm nêkenî. Birêz Ocalanî wextê muzakere û aştîye de tewr zaf cinîyan ardêne rojeve, nika zî ganî tewr zaf cinîyî têkoşîn bidî.”

Resayîşê fikrê Ocalanî yenî astengkerdiş

Pervîne qala konsepto newe ke kurdan ser de yeno meşnayîş kerde û wina va: “Tecrîdî ra dima şarê kurd ser ro konseptêko newe yeno meşnayîş. Weçînayîşê 7ê Hezîrane ra dima destpironêginayîya parlamenteran wedarîya, sîyasetmedarî erzîyayî zindan, qayûmî tayînê şaredarîyan bîyî, bajarî ameyî rijnayîş û merdimî ameyî qetilkerdiş. Nê heme çarçewaya nê konsepte neweyî de bîyî. Seba ke Birêz Ocalan kurdan ser de zaf tesîrin o, pêvînayîşî ameyî birnayîş. Tena vatiş yan zî vengdayîşêkî Birêz Ocalanî daxî seba kurdan zaf manîdar o.”

Ancax Ocalan eşkeno biqedêno

Pervîne wina va: “Herkes zano ke vengdayîşêkî Ocalanî daxî krîzî do çareser bikero. Ma wextê grevê vêşanî û pêrodayîşan de dî. Birez Ocalan tena seba kurdan nê, seba heme Tirkîya û Rojhelato Mîyanên şexsîyetêko muhîm o. Cok ra dewlete û hukmat hewl danî fikrê ey nêresî şarî. Ganî şarê kurd esla tecrîdî qebul nêkero. Ganî ma hêrsê xo nîşan bidî ke wa tecrîd biwedarîyo û prosesê aştî û muzakere reyna bikewo dewre. Eke heqîqeten demokratîkbîyayîşê Tirkîya yeno waştiş, o wext ganî selahîyetdarî newe ra Birêz Ocalanî reyde pêvînayîşan bidî destpêkerdiş. Çimkî bingeyê krîzî de tecrîd esto.”