ÎZMÎR - Dewa Ulamişî ê Îzmîrî de nano ‘karakilçik’ destê cinîyan ra vejêno û serê tezgahan de cayê xo gêno. Dewa Ulamişî de heme cinî xebityenê û wina vanê: "Tîya de cinî mêrdan zaftir xebityenê."

 

Dewa Ulamişî yê Seferîhîsarê Îzmîrî de tehmê verê vejênê meydan û nê rojan de ‘nano Karakilçik’ serê dezgehan de cayê xo gêno. Nano Karakilçik yew toximê en kan ê dewe yo.

 

Toximê  Karakilçikî hetê şaredarîya Ulamişî ra yeno pawitiş û berardişê ci yeno kerdiş. Şaredarî toximan berardiş keno û areye de genim tehneno û semedê nanî danê cinîyan.

 

Asîye Ozdene ke nan viraznena dîyar kena ke nanê Karakilçikî zaf baş o û da zanayîş ke do berardişê manî û toximê ci dewam bikerê.

 

Toxim emanetê cinîyan o

 

Asîyeya ke 7 serrî yo berardişê nanî kena bi 4 aşmîyo ke nan dana piro û va: "Şaredarîya ma toximê ci dî û da ma. Ma zî nan danê piro û roşenê. Zaf tebîî yo. Genetîkê ci nêameyo xirakerdiş. Ma çend nanî zî biroşê semedê tehmkerdiş danê verê destê muşterîyan. Ma bi kardî birnenê û danê muşterîyan. Her kes ecebneno. Sey nanê verîyê. Kesê ke tebera yenê no nanî gênê. Nan bi aşman eşkeno dolabe de bimano."