Henarê Efrînî bi destê cinîyan yenê komkerdiş!

  • 10:51 17 Teşrîna verêne 2017
  • NAROJANE

 

EFRÎN - Cinîyê qezaya Şêrawa ê Kantonê Efrînî, dest bi komkerdişê henaran kerdî.
 
Yew zî fekîyê Efrînî ke hetê cinîyan ra yenê komkerdiş henar ê. Mewsimê hamnanî ra heta payîze Efrîn bi henaranê xo û bi xemle daran bala merdimî ancenê serê xo. Wexto ke beno aşma teşrîna verêne, heta aşma teşrîna peyîne henarê Efrînî konê rojeve. Bi lebate cinîyan ê komkerdişê henaran xoza reyke bîn zî zergûn bena û bererdaşê xo dana. Cinîyan da zanayîş ke her roje saetê 5ê siba de heta 4ê şandî hêgayê henaran de xebityenê. Rojane 4 hezar L.S gênê.
 
Qezaya Şêrawa ê Kantonê Efrînî de, bi taybetî dewa Basûtî bi henaranê xo namdar a. Goreyê zanayîşê ke Heyetê Ramitişî dayo ma, darê henarî ê qezaya Şêrawa dorê 100 hezarî yê. Bererdaşê Hêgayê Henaran ê qezaya Şêrawa mîyanê serêke de nêzdîyê 25 hezar tonî yê. Çînayîşê henaran aşma teşrîna verêne de dest nêkeno û di aşmî dewam keno. Wayîrê bexçeyê henaran dimayê ke henaranê xo kom kenê bazaran de roşenê. Bazar de kîloyê henarê en baş bi 100 L.S. yenê rotiş.
 
Cinîyê kedkaran ard ziwan ke henarî her serre ra kêmî yê.