EDENE –15ê Temmuze teşebusê derbe ra dima OHAL ame îlankerdiş û îlanbîyayîşê OHALî ra dima bitaybetî zîndanê Kurdistsan û Tirkîya de kerdişê teberê merdimîye de her ke şono hîna zêde benî. Zîndanê ke zext û kerdişê teberê merdimîye tede zêde bîyî ra yewe zî Zîndanê Tîpa Tyî yê Dînarî yê Afyonî yo. 

 

Hepsîyo sîyasî Bawer Eyeyo ke nizdîyê 5 serrî yo ke ewja de yo, bi rayîrê telefonî zext û tedayê ke înana ser de yenî meşnayîş keyeyê xo ra vato. Dayîka Eyeyî Saadet Eyeyî qisey kerde. Dayîke Saadete dîyar kerde ke Bawerî înan ra vato ‘tîya de vera ma de zext û tedayî zaf zêde bîyî. Ma tîya de ewleyîye de nîyî. Cok ra ma veng danî rayapêroyî ke wa vengê ma bieşnawî’ û dayîke wina dewam kerde: “Lajê mi ewja de ewleyîye de nîyo û ez cuya lajê xo ra etirîyena. Ganî herkes wayîrê nê kerdişanê zîndanî de bivindero.”

 

Nivîna hepsîyan parçe kenî

 

Dayîke Saadete dewamê qiseykerdişê xo de vatişê Bawerî arde ziwan û wina va: “Bawerî ma ra wina va; tîya de her roje zextî zêde benî û ma zî vera zext û tedayan de xover danî. Gardîyanî bi hawayo kêfî hereket kenî. Hûmara ma hepsîyan 10 a. Vizêr şewe eştî koguşan ser de heta nivînanê ma bi kardîyan parçe kerdî. Wina aver şîyî ke deştişê ke şalanê ma de estbî, eşkawitî. Tîya de xeylê embazê ma nêweş î û nînî tedawîkerdiş. Yê ke tedawî benî zî bi hawayo kelepçeyin tedawî kenî.”

 

Dayîke va ‘seba ke çimê Bawerî de problem esto, wazeno şêro nêweşxane. Labelê seba ke Bawer bi hawayo kelepçeyin tedawîye qebul nêkeno muayene nêkenî û tepîya anî zîndan’ û wina domnaye: “Wexto ke ma şonî pêvînayîş gardîyanî merdiman teşhir kenî. Wexto ke ma xo resnenî cayê pêvînayîşî, ma vînenî ke zextî xeylê zêde bîyî. Gardîyanî sey polîsanê tîmê taybetinan hereket kenî. 4 gardîyanî hepsîyêkî taqîp kenî. Tim ser sereyê ma de yî û heme çîyê ma taqîp kenî. Hepsîyî reyna zî xover danî. Ez veng dana rayapêroyî, wa herkes nînan bieşnawo û veng bivejo. Eke çîyêk bêro sereyê hepsîyan îdareyê zîndanî berpirsîyar o.”