Melîke Aydin      

               

DÊRSIM- Polîtîkayê dewlete yê talankerdişê tebîetê Kurdistanî dewam kenî. Na çarçewa de Kurdistan de bi desan barajî, HES û sewbîna çîyî yenî viraştiş. Heto bîn ra her roje daristanî yenî veşnayîş û darî çarçewaya polîtîkayanê ewleyîye de yenî birnayîş. 

 

Nînan ra yewe zî dewa Marçikî ya ke girêdayeyê merkezê Dêrsimî ya de ocaxê kerrayan ke yeno viraştiş o. Seba viraştişê ocaxê kerrayan herême de darî yenî birnayîş û sondaj dîyayo erdî ro. Babete ser o aktîvîstê tebîetî reaksîyon nîşan dayî û vatî derheqê ocaxî de raporêkî nêameyo girewtiş. Heto bîn ra dewijî zî dîyar kenî ke ê do vera ocaxî de heme çî bikerî.

 

Seke yeno zanayîş şîrketê ke ocaxî virazeno, nizdîyê AKPyî yo. Şîrket aydê Velî Surogluyî yo û 4 ortaxê ci estî. Babete ser o dewijî qisey kerdî.

 

Ma do destûr nêdî

 

Makbule Yoltaya ke dewa Marçîkî de cuyena, wina va: “Ma prosesê mehkeme dayo destpêkerdiş. Tîya ca û warê ma yo; ganî ma ra pers bikerî. Dewe dewa ma ya, ma do destûr nêdî viraştişê ocaxî. Tayê axatî kenî û xo nizdîyê AKPyî kenî. Ma eşnawite ke mezrayê Hozmerek û Uzuntarlayî wina ameyî rotiş.”

 

 Wazenî dagîr bikerî

 

Meral Beyogluya ke dewa Xozmerekî ra derbazî dewa Marçîkî bîya, va ‘dewlete bi projeyanê HESî, madenkarî û înşaatî wazena Dêrsimî dagîr bikera’ û wina domnaye: “Eke ocax bêro viraştiş, ma nêşenî tîya de bicuyî. Ma heywananê xo tîya de çerênenî, bostan ronenî, domanê ma tîya de pîle benî. Dewlete wazena ma nê cayan biteriknî. Ma daristananê xo înan rê nêverdanî. Ma tîya de ameyî dinya, ma do tîya de bimirî.”

 

Seke yeno zanayîş Newala Pîlemurîye de zî bi seyan tewirê gandarî estî û verê cû seba ke o zî sey Parka Milî ya Munzurî bibo parke, muracat amebî kerdiş. Reyna verê cû derheqê projeyanê madenî yê dewanê Geyîksuyu, Pertek Koçpinar û Pîlemurîye qerarê betalkerdişî ameybî girewtiş.