Zeynep Turgut

 

COLEMERG- Gever de dimayê 'qedexeyê tebervejîyayîşê kuçeyan' qedîya qeza de taxê ke ameyê rijnayîş kalekolê ke ameyî rijnayîş Hemsereka Qezayê Colemergî ê DBPî Oznur Evîne hemverê nê reaksîyon mojna ra û va, "Emrê polîtîkayê ke şar nêwazeno zêde derg nîyo."

 

 Mîyanê di serrê peyînan de Sûrê Amedî, Nisêbînê Mêrdînî, Şirnax û qezayê ci Sîlopî û Cizîre de îlankerdişê "xoserîyê demokratîkî" dir dewlete 'qedexeyê tebervejyayîşê kuçeyan' îlan kerd û bi seyan hemwelatî merdî, bi seyan zî mecburê koçî ameyî kerdiş. Bajar û qezayî ser û bîn kerdî. Înan ra yew zî qezaya Colemergî Gever de dimayê rijnayîşî taxan de kalekolî ameyî înşakerdiş û wesayîtê zirxî serê kuçeyan de vindenê.

 

'Bi polîtîkayê asîmîlasyonan hêriş kenê'

 

Dimayê rijnayîşê Geverî polîtîkayê ke yenê kerdiş Hemsereka Qezaya Geverî yê DBPî Oznur Evîne derheqê babate de şîrove kerde û va ke eynî wextî de nê polîtîkayî şerê psîkolojîkê. Oznur wina va: "Her taxê ke Geverî de kalekolêke yena înşakerdiş. Heto bîn ra sewqîyatê leşkeran yeno kerdiş. Dewlete bi

kalekol û sewqîyatê leşkerî dir nêeşkena asayîşê şarî bigîro. Dewlete bi no tewir hêzê xo îlan kena. Tarîxî ra nata Gever her wext bi keleya xoverdayîşî yena zanayîş. Şar kultur, huner û ziwanê xo rê girêdayeyo no semed ra dewlete bi polîtîkayê asîmîlasyonî zî hêriş kena."

 

'Serê şarî de tehdît û teda estê'

 

Oznure bale ante ke dewlete wazena bi ters serê şarî de bandure bikero û wina va: "Dewlete heta nika ters û polîtîkayê tafsîyekerdişî rayîra berdê. Serê şarî de rastî tehdîd û teda estê. Çîyê ke dewlete vana asayîş xêrcê zirarî çîyêk bîn nîyo. Bandure OHALî zî nê çîyan dir esto. Çîyê ke wazenê bi rehetî kenê."