AMED- Qezaya Sûrî ke bi xoverdayîşê 103 rojan nameyê xo bi herfanê altûnênan tarîx de nuşte, nika raştê polîtîkayanê qirkerdişê kulturî û sîyasî yê dewlete yena. Bi aşman o ke dewlete taxanê Alîpaşa û Lalebeyî de rijnayîşî domnena û bi no hawa hewl dana ke demografîyaya Sûrî bibedilno.

 

Heto bîn ra tayê weqf û komeleyê ke nizdîyê cemat û AKP yî zî seba ke ciwanan pasîfîze bikerî ‘merkezê ciwanan’ akenî. Tewr peynî Weqfê Xizmetê Perwerde û Ciwanîye yê Tirkîya  ke nameyê ci mîyanê bêusûlîyanê 17ê Kanûne de derbaz bîbî, Sûr de abî.

 

Hukmatê AKPyî bi mufredato newe mekteb û qezayanê cîya-cîyayan de seba doman û ciwanan weqfan akeno û bi nê weqfan hewl dano ciwananê kurdan bênasname bikero. Xora heta nika qezaya ke tede fuhuş, ajanî û xirabîyê bînî ameyênê kerdiş, nika zî bi nê komele û weqfan ameye rojeve. AKP hewl dano bi nê komele û weqfan nesle ke girêdayeyê ci yî, awan bikero.

 

Na çarçewa de heta nika ‘Merkezê Ciwanîye yê Sûrê Amedî’, ‘Komeleya Piştîdayîşê Kultur, Azadî û Heqî yê Seba Ameyoxêka Roşne’ û ‘Weqfê Ciwanîye yê Tirkîya’ ameyî akerdiş û bi no hawa ciwanî girîyenî kontrole dewlete.

 

Ciwanê Sûrî vera nê komeleyan de reaksîyon nîşan danî û dîyar kenî ke ê do vera nînan de nasnameyê xo bipawî.