Gulîstan Azak

AMED- Cinêyê Amedî dîyar kerdî ke xebatê ke qayûm kerdê cu, înan mexdûr kenê û qet înan rê feyde nêkeno û wina vatî: "Qayûman dest dayî serê heme projeyê DBPî û sey ke înan kerdo mojnenê ra. Projeyê semedê feydeyê şarî, açernayî rantî." 

Çarçewaya OHALî de Hemserekê Şaredarîya Bajarê Girdî ya Amedî Gultan Kişanake û Firat Anlî ameybî tepiştiş û herinda înan de Qeymeqamê qezaya Etîmesgutî ya Anqara Cumalî Atîlla sey qayûmî amebî tayînkerdiş. Xora 27ê adara 2017î ra dima 103 şaredarîyanê DBPyî ra 83ê ci rê qayûmî ameyî tayînkerdiş.

Tayînbîyayîşê qayûman ra dima bi hezaran karkerî karî ameyî îxraçkerdiş, dezgeyî ameyî padayîş û dest ronîya pere û mal û milkê şarî ser de. Babete ser o cinîyî reaksîyon nîşan dayî.

Cinîyan ra Ayşe Yildize va ‘tayînbîyayîşê qayûman yeno manaya nêşinasnayîşê îradeya bi hezaran kesan’ û wina dewam kerde: “Îqtîdaro sîyasî tim qala sindoqî keno, labelê îradeya ke sindoqan ra vejîyayo zî nêşinasneno. Qayûm ma mexdûr keno; viraştişê rayîran raştê abîyayîşê mekteban ame. Cok ra ma nêşenî şêrî mekteb. Hertim ma erey manenî.”

Projeyanê şarî sey yê xo nîşan danî

Cinîyan ra Ayşe O.ye zî va ‘merdim nêşeno yê ke hetê şarî ra ameyî weçînayîş û yê ke ameyî tayînkerdiş muqayese daxî nêkero; îmkanê nêyî çin o’ û wina domnaye: “Ez qayûmî nêwazena, ez bawer kena ke o zî ma nêwazeno. Qayûm dest rona projeyanê şaredarîya DBPyî ser û nê projeyan açarna rantî. Qayûm bi xo vera demokrasî de yo. Şarê Amedî do qet qayûmî nas nêkerî. Hetê qayûmî ra cayê ke cinîyî tede mendêne ameyî padayîş, herinda înan de cayê zewejnayîşî ameyî akerdiş. Ganî ma vera nêyî de bivinderî.”

No tercîhê ma nîyo

Hatîce Başane zî dîyar kerde ke qayûmî senî ameyî dest bi viraştişê rayîr û asfaltî kerdî û wina va: “Nînan zî seba ke çime şarî boyax bikerî, kenî. Çimkî viraştişê rayîrî tena şarî mexdûr keno û sewbîna zî çî nêkeno. Viraştişê rayîran ver Amed de trafik xetimîyayo. Bi boyaxkerdişê çiman tena şarî hêrs kenî. Şar weçînîyayeyê DBPyîyan ra razî bî. Keso ke ma ey nêşinasnenî ameyo şaredarîya ma de ronişeno, û ma nêyî qebul nêkenî.”