ENQERE- Parlamenterê Enqereyî CHPî Şenal Sarihane, koxişê mehkuman de zîyaretîya Nurîye Gulmene kerde û da zanayîş ke  Nurîye roşnêke rojî zî nêvînena, zaf bîya zeyîf û binê tecrîdî de ya. Şenale ard ziwan ke ganî komîsyonê OHALî bi lezgînî no halî cigîrayîş bikero.

Derheqê halê Nurîye de parlamentere Şenale va ‘Nurîye ser hişê xo de ya, labelê zaf zeyîf bîya’ û wina va: “Nurîyeye pêvînayîşê ma de dîyar kerde ke aye wazena ke biagêro zindan û miqatekerdox waşte. Hem cayo serwîsa lezgîne ya verêne û yê nikayîn de binê tecrîdî de yena tepiştiş. Seba ke Nurîye bi hawayo zeyîf dest bi grevê vêşanî kerdbî, rewşa aye baş nîya. Nurîye dîyar kena ke qet şewq nêkewena odeyê aye.”

Ganî dosyayê înan rew biqedyî

Şenale va ‘ganî Komîsyonê OHALî rewşa Nurîye û Semîhî ser o bi hawayo rew cigêrayîş bikero û karê înan tepîya bido înan’ û wina dewam kerde: “Nurîye verê cû weşîya aye sey mehne ameye nawitiş û nêardî mehkeme. Nika îxtîmal esto ke na mehkemeya vernîya ma de zî aye nêarî mehkeme. Na rewşe hem heqê aye yê pawitişî îxlal kena û hem zî heqê aye ya azadîye îxlal kena. Ganî kamcîn şert û merc de bibo, wa bibo bîyarî mehkeme. Labelê goreyê mi heme çîyî ra muhîmêr o yo ke karê înan reyna bidîyo înan. Çimkî ê seba veradîyayîşî nê, seba agêrayîşê kare xo grevê xo domnenî. Ganî waştişê înan bêro esasgirewtiş.”

Avûkate Aytule zî va ‘pêvînayîşo peyên de destûr nêdîya ez şêra odeyê aye’ û wina domnaye: “Ma koridor de kursî ser de roniştî û ma pêvînayîş viraşt. Ode de sewbîna cilî estbî, labelê Nurîye tena bîye. Doktorê ke ewja de sey leşkerî hereket kenî. Nurîye nêwaşte ke ewja de bimano, waşte ke biagêro Nêweşxaneyê Zîndanî yê Sîncanî. Çimkî tîya de pêvînayîşê keye û avûkatî tena 5 deqa yo. Peynîya hewteyî de zî destûr nêdanî, ma pêvînayîş bikerî. Her cayo ke Nurîye erşawîyena yê verên ra xirabêr o. Nurîye paweyî miqatekerdoxî ya û ma do na rewşe biresin AÎHMî. Ma do heme rayîrî biceribnî.”