ANQARA- DEM Partî, semedê wesîleya 37ine serrgêra Qirkerdişê Enfalî eşkerayî da û kesê ke qirkerdiş de ameyî qetilkerdiş yad kerd. DEM Partî va: “Ma xo vîr ra nêkerd, ma efû nêkerd û ma do xo vîr ra nêkenê.” 

 

DEM Partî derheqê Qirkerdişê Enfalî yê 14ê nîsana 1988î de beyanatêko nuştekî da û heme cangorîyî yad kerdê. Eşkerayî bi îmzaya Hemverfeka Komîsyonê Şar û Bawerîyan ê DEM Partî Yuksel Mutlu ame weşanayene û wina ame vatiş: “No qirkerdiş hafizayê şarê kurdî de sey rojêke sîya ca girewt. Qirkerdişê Enfalî, bi fermanê rejîmê Sedam Hisên û bi paştdayîşê hêzê mîyanneteweyî û herêmî ame kerdiş.” 

 

‘Ma do Enfal xo vîr ra nêkerê’

 

Dewamê eşkerayî de wina ame vatiş: “14ê nîsana 1988î vîrê şarê kurdî de rojêka sîyaye ameye nuştene. Bi fermanê rejîmê Seddam Huseyînî, bi hemkarîya hêzanê serdest û pêşengîya dewletan planê qedînayîşî yê bi nameyê Enfalî dekerd dewre. Bi hezaran kurdî çekê kîmyayî zî tede bi rêbazanê hovane ameyê qetilkerdene. Dewî ameyê xeripnayene û mezelê komkî ameyê kenayene. No qirkerdiş tena wijdanê miletêkî de nê wijdanê heme merdimîye de dirbetêka xorîne akerde û na dirbete nêyena pêştene.

 

Enfal tena operasyonêko leşkerî nêbî. Enfal kerdişêko îmhayî bî ke ziwan, kultur, tarîx û ameyoxê şarê kurdî hedef girewt. Amancê Enfalî şaran xerîta ra pakkerdiş bî. 37 serrî vîyartî. Dejê ma teze, hêrsê ma gandar o. Ganî berpirsîyarê qirkerdişî ne vernîya tarixî de nê, ganî vernîya merdimîye û hiqûqî de zî hesab bidê. Ganî no suc bê ceza nêmano, ganî edalet bêra caardene. Ma sey DEM Partî; ma bi pîrozîya heqê cuye, seypêyîya şaran û îradeyê cuya bi rûmetî ra bawer kenê û ma heme cangorîyanê ke Qirkerdişê Enfalî de cuya xo vîndî kerda, bi hurmet yad kenê. Ma do seba heqîqet û edaletî têkoşînê xo bidomnê. Ma xo vîr ra nêkerd, ma efû nêkenê, ma do nêverdê bêro xovîrîrakerdene.”