AMED - MYKyê DBPyî dîyar kerd ke astengkerdişê ardişê cenazeya rojnamegere Cîhan Bîlgîn û Nazim Daştanî, binpaykerdişê huqûqîyê mîyanneteweyî yo. 

 

Heyetê Îdarekarîya Merkezî (MYK) ya Partîya Herêmanê Demokratîke (DBP) bi eşkerayîyêke reaksîyon vera astengkerdişê heyetê semedê girewtişê cenazeya rojnameger Nazim Daştan û Cîhan Bîlgîne waştêne derbazê Herêma Federe ya Kurdistanî bibo, mojna. 

 

Eşkerayîya nuşteyî bi sernameyê “Huqûqê mîyanneteweyî yeno binpaykerdiş” ame weşanayîş û wina ame vatiş: “Heyeto ke semedê girewtişê cenazeya rojnamegere Cîhan Bîlgîne û Nazim Daştanî waştêne derbazê Herêma Federe ya Kurdistanî bibo, 17 saetî yo Berê Sînorî yê Xabûrî de yenê vindarnayîş. Girewtişê cenazeyan bi hawayêkê keyfî yeno astengkerdiş û no zî bêrêzdarîyê hemverê vîrardişê kesê ke dinyaya xo bedelnayî û ezîyetkerdişê merdimanê înan o.

 

Tirkîya û Herêma Federe ya Kurdistanî bi hemkarîya ci, huqûqê mîyanneteweyî binpay kenê. Ganî heyet berê sînorî ra derbaz bibo, cenazeyan bigîro û rojnamegerê ke ameyê qetilkerdiş ercê cuye û têkoşînê xo bêrê definkerdiş.”