ŞIRNEX - Rayîrşîyayîşê Silopîya yê hemverê hêrişê Vakur û Rojhelatê Sûrîye ame kerdiş de venga, "Bêveng memanê" ame kerdiş. 

 

Rêxistina Partîya Herêmê Demokratîke (DBP) ya Şirnexî hemverê hêrişê Vakur û Rojhelatê Sûrîye ser, qezaya Silopiya rayîrşîyayîşêk organîze kerd. Girseyê şarî Mektebê Sereyîn yê Cumhurîyetî kom bîyî û pankartê "Rojawan rûmetê ma yo" wedarnayî. Pêwa astengîyê polîsan zî bi sloganê "Biciwîyo xoverdayîşê Rojawanî" ver bi awanîya Rêxistina Partîya Têduştî û Demokrasî (DEM Partî) rayîr ra şîyî.

 

'Rojawan rûmetê ma yo'

 

Hemserekê DBPyî yê Şirnexî Sekvan Kilinç reaksîyon vera hêrişan mojna û vat: "Ma Sûrîye de çareserî wazenê. Ma qebûl nêkenê reyke bîn çeteyê DAIŞî hêrişê Rojawanî bikerê. Ma do têkoşînê xo yê semedê Rojawanî dewam bikerê. Adresê aştî û çareserî Îmrali yo.”

 

Parlamenterê DEM Partî yê Bedlîsî Huseyîn Olan zî vat: "Meseleya kurdî bi şer nîna çareserkerdiş, meseleya kurdî bi metodê demokratîke çareser bena. Rayîrê bidestkerdişê nê zî dîyar o; no rayîr Îmraliyî ra derbaz beno. Birêz Ocalan pêvînayîşê peyîn de dîyar kerd ke o wayîrê hêzê teorîk û pratîko ke na mesela eşkeno bi bingehê qanûnî ser o çareser bikero.