MÊRDÎN - Hêrişê hemverê Vakur û Rojhelatê Sûrîye de, Nisêbîn de nobeta sînorî ser o yena protestokerdiş.

 

Hêrişê dewleta tirkan û çeteyê girêdayeyê ci Artêşa Neteweyî ya Sûrîye (SMO) hemverê Vakur û Rojhelatê Sûrîye de dewam kenê. Bi serkêşîya Partîya Herêmanê Demokratîke (DBP), Partiya Têduştî û Demokrasî (DEM Partî) û Têgêrayîşê Cinîyanê Azadan (TJA), sînorê Qamişloyî ser o nobete ameye destpêkerdiş. Nobete 4 rojî yo dewam kena.

 

Halîse Cebe ya beşdarê nobete bîye, dîyar kerd ke ê semedê paştdayîşê Rojawanî tîya yê û vat: “Hûmarêke pîl semedê pawitişê Rojawanî tîya ameyî têhet. Rojawan tena nîyo. Çira uca de cinî û tutî yenê qetilkerdiş? Her kes semedê Filistînî xo ver da, çira her kes semedê Rojawanî çimanê xo padano?"

 

Çalakîye bi slogan, tilîlî û govende dewam kena.