ANQARA - Keyeyê Şenyaşarî seba pêvînayîşê bi selahîyetdaran reyde şi verê awanîya Wezaretê Edaletî labelê destûr nêame dayîş ke keye bikewo zerre.

 

14ê hezîrana serra 2018ine de merdim û pawitoxê Parlamenterê AKPyî yê Rihayî verê Îbrahîm Halîl Yildiz qezaya Pirsûsî ya Rihayî de hêrişê keyeyê Şenyaşarî kerd. Hêriş de mêrde û di lajê Emîne Şenyaşar ameyî qetilkerdiş. Emîne Şenyaşar û lajê aye Parlamenterê Partîya Çep a Keske yê Rihayî Ferît Şenyaşar ke qirkerdiş de bi birîndarî xelas bibi, 9ê adara 2021ine de vernîya Edlîyeyê Rihayî dest bi Nobeta Edaletî kerdibî. Çalakîya Nobeta Edaletî Anqara de dewam kena.

  

Nêverdayî bikewê wezaret 

 

Keyeyê Şenyaşarî ewro reyna waşt ke verê berê Dîkmenî yê Meclisî ver bi Wezaretê Edaletî rayîr ra şêro. Keye, xeylêk reyan hetê polîsan ra ame astengkerdiş. Keyeyo ke astengîyê polîsan derbaz kerdî, heta verê berê Wezaretê Edaletî rayîr ra şi. Keyeyî waşt ke bi wezîrê edaletî reyde pêvînayîş bikero. Labelê selahîyetdaran waştişê keyeyî red kerd û destûr nêda ke bikewê awanîya wezaretî. 

 

Agêrayî meclîs

 

Nê ser de endamê keyeyî reyna agêrayî Meclis û vindertişê keyeyî dewam keno.