Mîdye Miqted

 

HELEB - Cinîyê Helebî derheqê tecrîdê giran ê serê Rayberê PKKyî Abdullah Ocalanî de dîyar kerdî ke do têkoşînê înan ê vera tecrîdî dewam bikero û wina vatî: "Tu qanûnê dewlete yê dinya de dewamkerdişê tecrîdêk giran ê serê rayber Apo de çin o. Rayberî venga aştî û azadîye keno û no  25 serrî yo mîyanê çar dêsan de yeno verdayîş. Lazim o dewlete û rêxistinê huquqî hemverê nê bêheqî ke yeno kerdiş, bêcewab memanê.”

 

Rayberê PKKyî Abdullah Ocalanî Zîndanê Tîpê Fyê bi Asayîşê Berzî yê Îmraliyî de binê şert û mercê giran ê tecrîdî de yeno tepiştiş û 2 serrî ra zêdeyêr o tu agahî ci ra nîna girewtiş. Pêwa muracatê seba pêvînayîşî yê keye û avîkatan zî pêvînayîşî yenê astengkerdiş. Nêrazîbîyayîş û çalakîyê hemverê tecrîdî zî hem Kurdistan, hem zî teberê welatî de dewam kenê. Cinîyê Helebê zî nêrazîbîyayîşê xo hemverê tecrîdî ardî ziwan û vatî: "Ma tu wext fek fikir û fehmê rayberî ra vera nêdanê. Tekoşînê ma  heta azadkerdişê rayberî do her wext bibo.”

 

‘Tecrîd bi rengêk newe zêde beno'

Endama Îdarekarîya Kongra Star a qezaya Ehdasî Emîne Suleyman da zanayîş ke yeno waştiş cuya Rayberê PKKyî Abdullah Ocalan bi peynî bikerê û wina vat: "Tecrîdê serê rayberê ma Abdullah Ocalanî tim dewam keno. Sewbîna her ke şino bi rengêk newe tecrîd serê Rayberî de zêde beno. Bi nê zî dişmin amanc keno ke cuya rayber  Abdullah Ocalanî peynî bikero." 

 

'Mendişê rayberî yê zindan de goreyê qanûnî nîyo'

 

Emîne bale ant serê qanûnê ke pê nînê û wina vat: "Mendişê rayberî yê zindan de goreyê qanûnî nîyo. Lazim o mendişê rayberî yê zindanî de dewam nêkero. Labelê pêro rêxistinê qanûnî derheqê na babete de bi wezîfeyê xo ranêwuştî. Bê wijdan nêzdîyê babeta rayberî bîyî. Dadgehê ke seba heqê merdiman veng danê ça mendê? Do key bi wezîfeyê xo wurzê? Ma baş zanê ke na bêvengî bi paştdayîşê dewletê mîyannetewî yo. No bi amancê çinkerdişê îradeyê şarê kurdî yeno kerdiş. Sewbîna wina wazenê fikr û fehmê rayber Abdullah Ocalanî vila nêbê."

 

‘Wa rêxistinê mîyanneteweyî yê heqê merdiman hayîya wezîfeyê xo bibî’ 

 

Emîneye bale ant serê girêdayîşê xurt ê şarî yê fikrê Abdullah Ocalanî û wina vat: “Girêdayîşê şarê kurd ê bi rayberê Abdullah Ocalanî yê sey goşt û neynikî ke girêdayeyê yewbînanî. Coka ra dişmen heme tewirê hêrişanê xo bi serê şarê kurdî de keno. Wazenê ma dewaya rayberîye ra dûrî bikerî, heto bîn de îrade û îradeya ma çinî bikero. La ma sey heme neteweyanê herêma Rojhelatê Mîyanenî de vengê xo verz kenî û vanê tecrîdî rê bes o. Wa rêxistinê mîyanneteweyî yê heqê merdim wezîfeyê xo bîyarî ca.” 

 

'Têkoşînê ma yê vera tecrîdî do dewam bikero'  

 

Emîneye da zanayîş ke do çalakî û têkoşînê înan dewam bikero û wina peynîya qiseykerdişê xo ard: “Rayberê şarê kurd Abdullah Ocalanî bîyayîşê ma bi ma da naskerdiş. Ma zî fek bîyayîşê xo ra nêverdenê û sozê berzkerdişê têkoşînê vera tecrîdî danî. Heta rayberê ma azad nêbo ma asan nêciwîyenê û çalakîya ma do her tim dewam bikera.” 

 

'Ma fek fikrê rayberîye ra nêverdenê’ 

 

Endama Keyeyê Cinîye ya qezaya Ehdasî, Roqeya Bekire wina reaksîyonê xo yê vera tecrîdî mojna û vat: “De ka wijdanê merdimîye yo, qey bêveng î? Ma çi sucê kurdan esto? Rayberê şarê kurd Abdullah Ocalan venga azadî, aştî û demokrasîye keno. Projeyê Neteweya Demokratîke vera zihnîyetê dewletê îqtîdarî de yî. No zî seba dewletê hegemonî ters o. Coka ra her ke şino tecrîd giran beno. Ma qet fek fikrê rayberîye ra nêverdenê. Têkoşînê ma heta azadkerdişê rayberîye do her tim dewam bikero.”