AMED - Taxa Fîskayaye ya qezaya Yenîşêhîrî ya Amedî de keyeyê Fehîme Ozene ser de awa lêşin herikîyena. Hemwelatija Fîskayaye Fehîme Ozena ke nêrazîbîyayîşê xo mojna, wina vat: “Ma heta nika beno ke 100 waştişname da, la tu netîceyêk nêvejîya.” 

 

Taxa Fîskayaye ya qezaya Yenîşehîrî ya Amedî de bi ser keyeyê hemwelatijan de awa lêşin ya Nêweşxaneyê Leşkerî herikîyena. Kesê ke keyeyê înan ser de awa lêşin herikîyena ra yew zî Fehîme Ozene ya. Nêweşxaneyê Leşkeran corê keyeyê Fîskayaye de yo û seba awa xo ya lêşin veng bikerê tu cayêk awan nêkerdî. Fehîmeye seba lêşinîya awe reaksîyon mojna û waştişê xo yê vindarnayîşê awa lêşin ard ziwan. 

 

'Awa lêşin herikîyena serê banyo, mitfex û hewşê ma’ 

Fehîmeye dîyar kerd ke lêşinîya awa Nêweşxaneyê Leşkeran hertim herikîyena keyeyê aye ser de. Fehîmeye da zanayîş ke awa lêşin mîyanê dêsê keyeyê aye de herîkîyena û kewena zerreyê keyeyê aye. Fehîmeye wina dewam kerd: “Na awa lêşine her tim serê banyo, mitfex û hewşa ma de yena. Boya pîs na awe ra yena. Lingê tutanê ma kewenê na awe mîyan, nêweş kewenê. 4 serrî yo na awe herîkîyena ma ser de. Bi raştî 10 serrî yo ke na awa lêşin herikîyena tîya, la 4 serrî yo ke zêde bîya.” 

 

'Awa lêşin ge-ge bi kef herîkîyena’ 

 

Fehîmeye ard ziwan ke lêşinîya awa Nêweşxaneyê Leşkerî aşmanê zimistanî de hîna zêde beno. Fehîmeye dîyar kerd ke awa lêşin hem herikîyena mîyanê keyeyî, hem zî herikîyena mîyanê baxçeyî. Fehîmeye wina dewam kerd: “Dêsê keyeyê ma na awe vera lêşin beno. Ma nêeşkenê newe zî bikerê, çike wexto ke zimistan beno na awe newera herikîyena. Ge-ge awa bi kef zî herikîyena keyeyê ma ser de. Nika hamnan o, coka ra awa ke herikîyena newe zuha bena. La payîz û aşmanê zimistanî de zêde awe yena û ma zî hîna zêde aciz benê.” 

 

Bi seyan waştişname dayî, tu netîce ci ra nêvejîya 

 

Fehîmeye eşkera kerd ke xeylê reyan waştişname şaredarîya ke binê rayîrberîya qeyûmî de ya rê şirawitî, la tu netîceyêk nê muracatan ra nêvejîya û vat: “Ma şinê waştişname zî danê, nînê nêewnîyenê û seba çareserîye zî tu gamêk nêerzenê. Beno ke ma heta nika 100 waştişname dabî, la tu cewabêk ci ra nêvejîya. Mixtarê ma zî eleqedar nêbeno.” 

 

'Wa çareserîyêk bêro dîyîş’ 

 

Fehîmeye tewr peynî dîyar kerd ke ganî lêşinîya awa Nêweşxaneyê Leşkerî ke serê keyeyê ma de yena û hewşa ma de yena bi lezkî peynî biba û vat: “Ma wazenê wa rewşa ma bêrî bivînê û çareserîye pê bîyarê.”