Dîlan Babat

 

ANQARA – Avûkata dosyayê qirkerdişê keyeyê Dedeogullariyî Ebru Akale dosya ercnaye û da zanayîş ke xeylê delîlî nêfînayî dosya û waşt ke xeylê delîlê ke ganî dosya de ca bigêrî estê la yew zî çin o. 

 

12 Gulana 2021î de qezaya Meram a Konyaye de hetê keyeyê Keleş û Çalikî ra vera keyeyê Dedeogullariyî de hêrişê nîjadperestî pê ame û keyeyê Dedeogullariyî ra 7 kesî netîceyê hêrişî muracatê asayîşî kerdbî û dîyar kerdî ke asayîşê canê înan çin o. Vera muracatî reyna zî pawitiş û asayîş nêame kerdiş û tetîkkêş Mehmet Altunî 30ê Temmuze de keye qetil kerd. Qirkerdişî serî ra di serrî derbaz bî û vera nê de nizdîbîyayîşê muhakeme û îqtîdarî yê hemverê kurdan xo dewaya Dedeogullariyî de reyna mojna.  

 

Avûkatê dewaya Dedeogullariyi ra yew Ebru Akale derheqê qirkerdişê prosesê muhakemekerdişî de ercnayîş kerd. 

 

‘Seba ke tedbîr nêame girewtiş qirkerdiş pê ame’ 

 

Ebruye da zanayîş ke çend dosyayê ke heme bêhuqûqî kenê bi eşkera raşte de estê û înan ra yew zî dosyaya Dedeogullariyî ya. Ebruye wina qisey kerd: “Qirkerdiş ra ver 12ê Gulane ra heta 30ê Temmuze prosesêk verê çiman de esto. Wexto ke ewil keye raştê hêrişî yeno hetkarî wazeno û muracatê tedbîrî kenê. Muracatê CÎMERî danê. La seba ke tedbîr nîno  girewtiş qirkerdiş 30ê Temmuze de pê yeno. Ma bi desan reyan nê çîyî mehkema de ard ziwan ser” 

 

‘Merciyê cipersayîşî îtîrazê qerarî kerd’ 

 

Ebruye dewamê qiseykerdişê xo de dîyar kerd ke dimayê ke qirkerdiş pê yeno, mercîyê cipersayîşî mecbûr mend newe ra hîn kar û baran ra biewno û wina vat: “Hêrişê 12ê Gulane de bê ke paweyê cigêrayîşê krîmînal yê ‘destê kamî de çeke estbî, destê kamî de çinbî’ bimanê, derheqê hîn şikdaran de qerarê bêtaqîbkerdişî ame dayîş. Dimayê nê bêtaqîbkerdişî cigêrayîşê krîmînal yê ame de tespîtkerdî ke destê hîn şikdaran de çî bîyê û mecbûr mend îtîrazê qerarê xo yê nêtaqîbkerdişî bikero. La çi heyf seba tedbîrê pawitişî nêame girewtiş, keyeyê  Dedeogullari ra 7 kesî ameyî qetilkerdiş.” 

 

'Xeylêk delîlî nêkerdî dosya'  

 

Ebruye dewam de dîyar kerd seba xeylêk delîlê ke nêame tespîtkerdiş, nêvînaye ameyê vînayîş vejîyê werte û bikewê dosyaya waştişî kerdê la heyetê dadgehe hîn qebûlkerdê û hîn zî red kerdê. Ebruye wina vat: “Ma waşt xeylêk delîlî dosya de ca bigîrê û bêrê cigêrayîş. La nê delîlî nêkerdî dosya. Dosya nika dadgerî de ya. Ma waşt ke bi delîlan bêrê ercnayîş. Ma paweyê ercnayîşê dadgerîye yê. Aşma êlule de do roniştişê diyîn bêro vînayîş. Dosya de ma do paweyê temyîzî bê. Eke netîceyê ke ma pawenê nêrê girewtiş, ma do muracatê Dadgeha Desturê Bingehîn (DDB) û Dadgeha Heqê Merdiman a Ewropa (DMME) bikerê.”