MUGLA - Parlamentera Partîya Çep a Keske Perîhan Kocaye dîyar kerd ke cendirmeyan nêverda ke ma şêrê Daristanê Akbelenî û bi şîdetin hêriş kerdî û vat: “No çî nîşaneyê huqûqê dişmenîye yo û ma do şarî reyde xoverdayîşê xo dewam bikerê.” 

 

Daristanê Akbelenî yê Îkizkoyî ke tede qirkerdişê daran yeno kerdiş qezaya Mîlasî ya Muglaye de yo. Yeno waştiş ke komirê herême bidîyo Santralê Termîkî yê Yenîkoyê Kemerkoyî yê girêdayeyê Holdîngê Limakî. Şar vera nê caardişî de xover dano. Seba paştîdayîşê parlamenterê CHPyî ameyî raşte la cendirmeyan nêverda ke Hemverfekê Partîya Çep a Keske Îbrahîm Akin û parlamentere Perîhan Kocaye bikewê raşte û bi şîdetin hêriş kerdî.  

 

Parlamentera Partîya Çep a Keske Perîhan Kocaye derheqê babete de ajansê ma JINNEWSî rê qisey kerd.  

 

Perîhane destpêkerdişê qiseykerdişê xo de bale ant serê têkoşînê Akbelenî û wina vat: “2 serrî yo ke uca de xoverdayîşêk vera qirkerdişê xozaye esto. Akbelen vera faşîzmî de xover dano. Dimayê weçînayîşan îqtîdar lez da sazbîyayîşê faşîzmî. Bi vayeyan, qetlîyam û qirkerdişan zilmê hemwelatijan keno. Na polîtîka nê prosesî de zêde ameye hîrakerdiş. Çîyê ke Akbelenî de yenê ciwîyayîş munferît nîyo. Uca de 2 serrî yo ke xoverdayîş esto. Ma zî parçeyêk nê xoerdayîşî yê. Çend ke Anqara de seba babeta vayeyan meclîs ame komkerdiş, ma zî seba çalakîye ameyî tîya.” 

 

Hemverê faşîzmî xoverdayoxê Akbelenî  

 

Perîhane dîyar kerd ke Partîya Çep a Keske hewl dana paştîdayîşê Akbelenî bikera û wina dewam kerd: “Bi tewrbîyayîşê hêzê demokratîk, ked û ekolojîstan ma ameyî raşte. Bi ameyîşê ma reyde huqûqê dişmenîye ame averberdiş. Çîyo ke 3 roje yo kenê eslê xo de çîyê ke 3 serrî yo hemverê xoverdayîşê Akbelenî de yenê kerdiş. Hemverê faşîzmî de xoverdayoxê Akbelenî barîkatan ronayî û ma kişta îşkence, destbendkerdiş û kuyayîşî de têkoşîn kenê.”   

 

Çalakîya roniştişî ameye destpêkerdiş   

 

Perîhane qiseykerdişê xo yê peyênan de wina qala hêrişî kerd û vat: “Qanûnan pratîze nêkenê û qanûnanê xo nas nêkenê. Bi gaz û hêrişan hemverê xoverdayîşê şarî de vejîyenê. Sey parlamentere heqê ma zî esto ke ma paştîdayîşê çalakîyan bikerê û raşteyo ke ada qirkerdiş tede pê yeno de bibî. La qanûnê seyyewbînan ameyî binpaykerdiş. Sey parlamentere nêverdayî ke ma bikewê raşte. Ma waşt ke ma îşkenceyo ke pê ameyo bidê vindarnayîş. Ma vatişê xo dewijan rê resna û ma înan reyde xover da. La parlamenterê CHPyî girewtî raşte. Ma vera nê çîyî de çalakîya roniştişî da destpêkerdiş.”   

 

Parlamentere Perîhane da zanayîş ke do sey parlamenterê şarî seba raporkerdişê qetlîyamo ke ameyo ciwîyayîş têkoşînê xo dewam bikerê.