Marta Somek

 

STENBOL - Polîsê bi nameyê Enes Aydemîrî tecawuzê S.S.ye kerdbî. Serra 2021î ra naya S.S.ye yena tehdîtkerdiş û vera tehdîtan de reyna zî fek têkoşînê huqûqî ra nêverdena û wazena ke hêrişkar bêro cezakerdiş û kar ra bêro dûrîkerdiş. 

 

Polîtîkayê AKP-MHPyî vera kerdoxî bi nêgirewtişê cezayan yenê xelatkerdiş û rayîrê qetilkerdiş, tecawuz û şîdetê vera cinîyan akenê. Kurdistan û Tirkîya de hîrigoşeyê camêrd-dewlet-muhakemeyî de kerdox yenê xelatkerdiş û cinî û û tutî bêpawitiş yenê verdayîş.   

 

Înan ra yew zî polîsê bi nameyê Enes Aydemîrî ke pawitoxê Amirê Asayîşî yê Mudirîya Emnîyetî yê qezaya Cizîrî yê Şirnexî yo. 8ê nîsana 2021î de Enes Aydemîrî tecawuzê S.S.ye kerd. Bi serran o seba muhakemekerdişê Enes Aydemîrî têkoşîn yeno dayîş. La her çend ke S.S.ye têkoşîn bikera zî bi desan reyan hetê Enes û merdimê Enesî ra bi mergî ameye tehdîtkerdiş. Heto bîn de derheqê S.S.ye de zî dewaya ‘Buxtanî’ ameye akerdiş. 

 

12ê temmuze de S.S.ye reyna hetê Enes Aydemîrî ra ameye tehdîtkerdiş. S.S.ye demê verênan de qala qewimîyayîşo ke sereyê aye ra derbaz bibî ajasê ma JINNEWSî de ard bî ziwan.  

 

Tîya ra verê cû S.S.ye ajansê ma rê qisey kerdbî û bale antbî serê şîdetê psîkolojîk û fîzîkî yê Enes Aydemîrî. Hema ke prosesê muhakemekerdişî dewam kerdêne S.S.ye 4ê nîsana 2022yî de hetê Enes Aydemîr û embazanê ci ra ameye tehdîtkerdiş. 11ê nîsane de S.S.ye ajansê ma rê qisey kerdbî û vatbî ke aye muracatê Mudirîya Asayîşî ya Peyasî ya Amedî kerda û qerarê dûrîfînayîşî girewta. Goreyê malumatê S.S.ye derheqê Enesî de 4 reyan dewaya îdarî ameya akerdiş û kişta ci de zî tehdîtê ci dewam kerdî. 

 

Teşrîna Peyêne ya serra 2022yî de reyna S.S.ye bi tehdîdê Enesî reyde ameye rî bi rî menda û vato: “Çîyo ke lazim bikero ez do bikera. Çike to hedîse çapemenîye daya pêhesnayîş. Ti terorîst a û paştîdayîşê înan kena.” Heto bîn de embazê Enesî zî vato ‘Ti şîzofren a, nêweşîya psîkolojîk to de esta, şo tedawî bibe.’ Nê vatişî kişta hedîseyî de travmayêk gird serê S.S.ye de verda. 

 

Heto bîn de derheqê xebera ma ya ke 11ê nîsane de ameye weşanayîş, keyepelê ma 2 reyan ameye astengkerdiş. Kişta keyepelê ma de hesabê medyaya dijîtale yê Rojnameyê Yenî Yaşamî, Yenî Ozgur Polîtîka, Hemsereka Pêroyî ya Komeleya Heqanê Merdiman (ÎHD) Eren Keskîn, rojnameger Nûrî Akmanî ameyî astengkerdiş.   

 

Enes Aydemîrî serra 2022yî de Mudirîya Asayîşî ya qezaya Cizîrî ya Şirnexî ra şirawîya dezgehêk girêdayeyê Bakirkoyê Stenbolî. Hedîseyê tecawuzî hetê Fakulteya Çapa ya Stenbolî ra zî ame tesilîkerdiş. S.S.ya ke prosesê tecawuzî de muracatê sucî kerda la di reyna qerarê ‘bêtaqîpî’ ame dayîş. 13ê temmuze de dewamkerdişê tehdîdê Enes Aydemirî vera hetê Mehkemaya Keyeyî ya 1ine ra qerarê dûrîfînayîşê 30 rojan dîyaye Enes Aydemirî. 

 

S.S.ye dîyar kerd ke qet do fek têkoşînê xo ra nêverda û venga rayaumûmîye kerd ke wa derheqê babete de hîssin bibî. S.S.ye da zanayîş ke ganî Enes kar ra bêro dûrîkerdiş û bêro cezakerdiş.