Mîdye Miqted

 

HELEB - Endama Kordînasyonê Kongra Starî Nêrgiz Bekire dîyar kerd ke tecrîdê hemverê Rayberê PKKyî Abdullah Ocalanî tecrîdê hemverê şarê kurdî yo û vat: "Venga KNKyî ke seba şikitişê tecrîdî ame kerdiş muhîm a. ganî heme partîyê sîyasî û rêxistinê sivîlî wayîrê vindertişêk bibê. Heto bîn de ganî CPTyî goreyê wezîfeyê xo têbigêro.” 

 

Avûkatê Rayberê PKKyî Abdullah Ocalanî hewte de di reyan seba pêvînayîşî muracat kerdêne la yan baş yan zî xirab tu cewabêk nêameyêne dayîş. Heto bîn de no bî 2 serrî yo ke tu xeberêke ci ra nîna girewtiş. Rojanê verênan de derheqê tecrîdî de Kongreya Neteweyî ya Kurdistanî (KNK) venga Komîteya Wezîran a Konseyê Ewropaye, Meclîsê Parlamenteran ê Konseyê Ewropaye, Yewîya Ewropaye û Neteweyê Yewbîyaye kerd ke seba pêvînayîşê Rayberê PKKyî Abdullah Ocalanî heyetêk bêro awankerdiş û dewlet û hêzê siyasîyî ra waşt bî ke zextê huqûqî, sîyasî û dîplomatîk bi Tirkîya bikerê. 

 

Derheqê babeta tecrîd, venga KNKyî û vindertişê Komîteya Vernîgirewtişê Muameleyo Xirab û Îşkenceyî ya Ewropa (CPT) de endama Kordînasyonê Kongra Starî ya taxa Şêxmeqsûdî Nêrgiz Bekire ajansê ma JINNEWSî rê qisey kerd.   

 

28 aşmî yo xebere nîna girewtiş  

 

Nêrgize dîyar kerd ke 28 aşme yo tu xebere Abdullah Ocalanî ra nîna girewtiş û wina dest bi qiseykerdişê xo kerd: “Malumatê ma rayberîyê ma ra çin o û her roja ke derbaz bena zî tecrîdê serê rayberîyê ma giran beno. Bi no hawa pêroyê şarê kurdî zî mîyanê tecrîdêk giran de yê. Na cezaya dîsîplînî ya ke serê rayberîyê ma de ameya birnayîş tu qanûnêk dewletan de çin a û nîna qebulkerdiş. Seba ke rayberê ma her game de qala aştî û biratîya şaran keno, tecrîd giran beno. Çike no goreyê sîstemê dewletan ê faşîstan nîyo.” 

 

Venga KNKyî  

 

Nergîze derheqê venga KNKyî de zî nê çî vat: “Venga KNKyî seba şikitişê tecrîdî muhîm a. ganî heme partîyê siyasî, rêxistinê sivîlî seba rayberî wayîrê vindertişêk bibî. La hemverê venga KNKyî de tu kes wayîrê wezîfeyê xo nêvejîyeno. Heto bîn de CPTyî babeta rayberîye de seba dewleta tirke goreyê menfîetê xo têgêreno. Ma waştiş kenê ke CPTyî goreyê wezîfeyê xo têbigêro.” 

 

'Dewletê serdestî çareserîye nêwazenî’ 

 

Nêrgize dewamê qalîkerdişê xo de bale ant tesîrê fikr û felsefeya Abdullah Ocalanî ser û wina dewam kerd: “Bi fikirê raybertîye venga heme şaran ame kerdiş ke şar bi xo hemverê zîhnîyetê dewletê faşîstî de bivejo. La hemverê têkoşînêk bi no hawa de zî dewletê faşîstî ke bi bingeyê kapîtalîzmî payan ser de manenê fikr û ercnayîşê rayberî qebul nêkenê. Fikr û ercnayîşê rayberîye yê têduştî yê netewê demokratîk û azadîya şaran xo reyde çareserîye zî ano. La nê dewletê ke vera fikran de vejîyenê tu kombîyayîşê xo yê sîyasî de nêkewtî hewldayîşê çareserîya problemê netewan. Eynî wext de zî bi zîhnîyetî fehmê heme şaran binpay kenê. La şaro ke xo serê fikr û ercnayîşê rayberî de perwerde kerdî bi nê fikrî êdî şer û têkoşînê xo vera zîhnîyetê nê dewletan dewam kenê.” 

 

'Seba azadîya fîzîkî têkoşînî gird bikerêne'  

 

Nêrgize qiseykerdişê xo yê peyênan de dîyar kerd ke vera tecrîdî de ganî têkoşîn bêro girdkerdiş û vat: “Her çar parçeyê Kurdistanî de seba azadîya rayberî çalakî yenê viraştiş. Xoverdayîşê şarî berz beno. La no tena mird nêkeno. Ganî avûkat, pawitoxê merdiman û sîyasetmedarê ma bi rayîrê siyasetî wezîfeyê xo bîyarî ca û zextê serê rêxistinê heqê merdiman û CPTyî bikerê. Heta ke malumatêk, xeberêk rayberîye ra nêro girewtiş. Heto bîn de ez venga şarê ma yê azadî û aştîwaştoxan kena ke seba azadîya fîzîkî ya rayberî têkoşînî gird bikerê û çalakîyê hîna hîra û xurtan pê bîyarê.”