Gulîstan Şahîn 

 

QAMIŞLO - Endama Têkilî û Tifaqê Demokratîke ya Kongra Starî Rûken Ehmede dîyar kerd ke Şorişa Rojawanî 7 serî ra heta 70 serrî pêroyê komelî bi rêxistin kerd û vat: “Seserra 21ine merheleya têkoşînî yê cinîyan hîna zêde daya vernî, ganî ma bi serkêşîya cinîye nê destkewtişê ke mabenê 11 serrî de bi şorişî dest fînayî, ser bifînê.”

 

Çeqa şorişê 19ê Temmuze Kobanê de dest pê kerd û vilayê Bakur û Rojhelatê Sûrîye bî û seba cinî û şaranê azadîwaştoxan bî îlhamê azadîye. Ewro bi wesîleya şorişê şaran, sîstemê Netewê Demokratîke ke hetê Rayberê PKKyî Abdullah Ocalanî ra ameybî dîyarkerdiş rayra şino ke heme netewî cayê xo tede gênê. Ewro serê herra pîroz ê Bakur û Rojhelatê Sûrîye de cinîyî serkêşîya şorişî kenê û serra xo ya 11ine bi heyecan û zerrîwazîyêk gird pîroz kenê. Derheqê muhîmî û serrgêra şorişê 19ê Temmuze de Endama Têkilî û Tifaqê Demokratîke ya Kongra Starî Rûken Ehmede ercnayîşê xo pare kerd.

 

Rûken Ehmede sere de serrgêra şorişê 19ê Temmuze pêroyê şaran û cinîyan rê pîroz kerd û vat: “Şorişê wisarê şaran Tunis de dest pê kerd. Gam bi gam vilayê pêroyê welatan bî. Şorişê Tunisî sey serrewedarnayîşêk pê ame û şar rêxistinkerde nêbî. Sûrîye de zî no serewedarnayîş de dest pêkerd. La ferq û cîyayeyê nê şorişan û şorişê Rojawanî se bî? No şoriş bi artêşa azadîye dest pêkerd. Tewrbîyayîşê cinîyan tîya de zî estbî û Rejîm xeylê tedayê girdî bi înan kerdêne. La rewşa înan çi ya û projeyê înan çi yo, çinî yo. Waştêne ke rejîm bikewo, la roja ewro de raştî û dewayê înan ê şorişî, ame bedilnayîş û tesîrê dewlete înan ser de kerd.

 

‘Şorişê Rojawanî, xeta hîrine esas girewt’ 

 

Rûkene bale ant şorişê Rojawanê Kurdistanî ser û wina dewam kerd: “Ferq û cîyayeyê şorişê Rojawanî no bî ke xeta hîrine esas girewt ke xeta xo pawena îradeyê şaran. Xeta hîrine no yo ke şar xo bi xo rayra beno û kam cû het bêro îqtîdarî ser zî do waştişê şarî pê bêro. Xeta hîrine bedilnayî û açarnayîşê girdî mîyanê komelî de pê ardî. Eke biwazîyo ke komelêk demokratîke bêro awankerdiş ganî merdim sere de azadîya cinîye bi dest bifîno ke demokratîkbîyayîşê komelî pê bêro. Şorişê ma xeylê hetan ra ame rayraberdiş. Şorişê zîhnî, komelkî ame rayraberdiş. Şorişo ke xo heme îqtîdaran ra bixelisno ame dayîş. Pêrodayîşê bi serran ê ke sîstem komelan yewbînan ra dûrî fînayo de şorişêk pê ame. Heto bîn de hemcuya azad û yewbînan reyde ciwîyayîş ser fînayî. Sîstem nakokîyan xorî kerdo û yewbînan reyde ciwîyayîş zehmet kerdo. La bi serkêşîya cinîyan no sîstem ame bedilnayîş.”

 

‘Serkêşê şorişî cinî bî’

 

Rûkene dewamê qiseykerdişê xo de destpêkerdişê şorişê Rojawanê Kurdistanî wina ercnaye û domna: “Eke şoriş zemînê ci yê rêxistinkerde nêbo, xo nêpawo rêxistinê fikrî û zanistî, do zerreyê ci veng bibo, do bi rayîrê sîyasetî bibedelîyo û do no şoriş xo nêresno amacê xo. Seba nê çîyî zî şorişê Rojawanê Kurdistanî xo pawit fikrê ke Rayber Apo pêşkêşê cinîyan kerd. No fikir 50 serrî xo pey de verda. Ma şorişê xo pawenê destkewtişê şorişê cinîyan û tewr zêde zî yê cinîya kurde. Cinîyê kurdî nê şorişî de bîyî serkêş, çike zemînê înan xurt bî. Cinîye hetê xoserîya cinî, artêşa cinî, îradeyê sîyasî yê cinî, qerar girewtiş, xo bîyayîş, xo naskerdiş û bîyayîşê cinîye xo awan kerd. Cinîye nê destkewtişan ser de awan bî û tewrê şorişê 19ê Temmuze bî.”

 

‘Şorişê ma heme pêameyan verik kerd’

 

Rûkene da zanayîş ke serkêşîya Şorişê Rojawanê Kurdistanî cinîya kurde kerd, la bî keyeyê pêroyê pêameyan û vat: “Şorişê Rojawanî û şorişê cinîyan tena merheleya cinîya kurde de nêmend. Serkêşîyêka gird kerd. Heme pêameyî xo nê şorişî de dîyî. Herêmê ereban ke xeylê tedayî destê DAIŞî ra antî, xo nê şoriş û projeyê netewê demokratîke de dîyî û tewrê ci bîyî. Tîfaqê cinîyan merheleya zerreyî de virazîya. Şorişê cinîye bî sembolê dinya û Rojhelatê Mîyanenî. Dinya de xeylê enternasyonalîstî tewrê nê şorişî bîyî û şehîdê înan zî virazîya. Bi raştî zî no şoriş bî cewabê heme cipersayîşan.”

 

‘Destkewtişê şorişî bipawê’ 

 

Rûkene tewr peyîn da zanayîş ke ganî destkewtişê cinîyan bêrê pawitiş û wina qedêna: "Wexto ke ma qalê Rayber Apo kenê û vanê tenê sey Rayberê kurdan nîno şinasnayîş, projeyê netewa demokratîke ke pêşkêş kerd pêro şar û cinî xo ci de dî. Rayber  Apo pêroyê dinya sey Rêbertî yeno vînayîş. Seba Rayber Apo temamê merdimayî de proje laver berd. Netewa demokratîke hem Rojhelatê Mîyanên de hem zî seba cinî, caardişê ci zî cayê balantişî yo. Jineolojî û Netewa Demokratîke xeylêk unîversîteya dinya de sey nimûne yena vînayîş û wendiş. Ma xeylêk cayê dinya de beşdarê konferansan benê û ma wazenê nê destkewtişî bibê malê temamê dinya. Seserra 21ine sewîyeya têkoşînî yê cinîyan zêdeyêr dayo vernî, ganî ma bi rayberîya cinî no destkewtişê ke mîyanê 11 serran de bi dest kerda, serkewte bikerê. Seba misogerî û pawitişê nê şorişî ma rastê hêrişan zî yenê. Seba ke ma xo şerê tayberî ra bipawê, ganî zanebîyayîşê fikrî û pawitişê fikrî, fizîkî û awankerdişê tifaqê sewîyeya dinya de ca bîyarê ke bieşkê rayîr vernîya hêrişan padê."