Oznur Deger

 

MÊRDÎN - Nisêbîn de keso ke tutêke tacîz kerdibi, pêwa qeydê dîmenan 9 aşmî yo nîno vînayîş.

 

Qezaya Nisêbînî ya Mêrdînî 16ê teşrîna verêne 2022ine de tuta ke seba nan bigîro keyeye ra vejîya û hetê kesêk ke nameyê ey nîno zanayîş a ameye tacîzkerdiş. Tute rewşe keyeyê xo rê qal kerd û eynî roje keye Midûrîyê Emnîyetê Nisêbînî de gerre kerd. Dima ra keyeyî bi avûkatê xo reyde Serdozgerîya Komare ya Mêrdînî zî gerre kerd.

 

Vernê de tacîz dima ra taqîbkerdiş

 

24ê teşrîna peyêne 2022ine de Merkezê Taqîbkerdişê Tutan ê  Mêrdînî de îfadeyê tute ame girewtiş û tute wina vat: "…Mi nan girewt û market ra vejîyaya. Ez şîne keye. Kesêk ke mi nas nêkerdêne vat, ‘otobusê Amed-Mêrdînî ça de yê? Bêre ez pere bidî to, ma kay bikerê. Ti qezenc bike, ez pere bidî to'. mi vat 'nê'.  Dima ra nê kesî mi taqîb kerd. Pey mi de vat, ‘ti pere wazena qezenc bikerê, bêrê verê mi'. Dayîka mi mî dî û venga mi da. Ê keso ke dayîka mi dî, seke bi telefonî reyde qisey bikerê mi ra dûr kewt'."

 

Serê gerrekerdişî pêwa tacîz qeydê Sîstemê Îdarekarîya Asayîşê Bajarî (KGYS) de ame vînayîş zî pêwa eşkalê şikdarî, nasname nêame tespîtkerdiş. Seba tespîtkerdişê nasnameyê şikdarî, dîmenê qeydan 5ê Kanûna 2022ine de şirawitî Amîrîyê Laboratuvarê Krîmînal ê Cendermeyan ê Wanî. La raporê ke ame şirawitiş de zî ame vatiş ke şexs nêameyo tespîtkerdiş. Keyeyî 1ê Sibata 2023ine de Zabitnameyê Cigêrayîşê Dîmenî tewrê dosya kerd û reyna şirawit laboratuvar. La reya diyîn krîmînalî şikdarî tespît nêkerd.

 

Pêwa qeydê dîmenan dosyaya ke nameyê şikdarî zî hema nêameyo dîyarkerdiş, bi aşman o sewîyeya cipersayîşî de yeno pawitiş. Pêwa delîlê somutî yê destan de dosya tarîtî de yena verdayîş.