RIHA - Keyeyê Şenyaşarî 845 rojî yo çalakîya xo ya "Nobeta Edaletî" dewam kena. Keyeyê çalakîya ewro de nê mesajî pare kerd: "Ma do nêheqîya ke ma rê ameya kerdiş, 8ê temmuze de reyke bîn eywanê dadgehe de bîyarê ziwan."

 

14ê hezîrana serra 2018ine de merdim û pawitoxê Parlamenterê AKPyî yê Rihayî yê verê Îbrahîm Halîl Yildiz qezaya Pirsûsî ya Rihayî de hêrişê keyeyê Şenyaşarî kerd. Hêriş de mêrde û di lajê Emîne Şenyaşar ameyî qetilkerdiş. Emîne Şenyaşar û lajê aye Parlamenterê Partîya Çep a Keske yê Rihayî Ferît Şenyaşar ke qirkerdiş ra bi birîndar xelas bibi, 9ê adara 2021ine de vernîya Edlîyeyê Rihayî de dest bi Nobeta Edaletî kerdebî. Çalakîya keyeyî roja 845ine de dewam kerd. Seba peynîya  hewteyî de edlîye padeye ya, Emîne Şenyaşar nobete keyeyê xo yê Pirsûsî de dewam kerd. 

 

Keyeyê Şenyaşarî serê hesabê xo yê medyaya dijîtale de bale ant serê roniştişê 18ê temmuze yê derheqê qirkerdişî û nê mesajî pare kerd: "Ma hemverê nêheqî tu wext bêveng nêmendî û ma do bêveng nêmanê. Ma do nêheqîyê ke ma rê ameyê kerdiş, 8ê temmuze de reyke bîn eywanê dadgehe de bîyarê ziwan. Heta ke edalet pê bêro, no vatişê ma do dewam bikero.”