STENBOL - Tepişteya nêweşa giran Gonul Erdogan ya 15 serrî yo zîndan de ya û 28 serrî ceza ci rê ameya birnayîş, nêweşa helînayîşê esteyan a û ameya sewîyeya peyîn. Gonule ganî bêra dermankerdiş la dermankerdişê aye kerdiş û hacetê egzersizan nîno dayîş.

 

Tepişteya nêweşa giran Gonul Erdogan 10ê teşrîna verêne 2008ine de Şîşlîyê Stenbolî de bi îdiayê ‘bombeya gane’ ameye destbendkerdiş û bi îdiayê ‘endamîya rêxistine’ 28 serrî ceza ci rê dayî. Gonule nika Zîndanê Cinîyan ê Gebzeyî de tepişte ya. Goreyê dayeyê ÎHDyî Gonul yew nêweşa giran ya zîndanê Marmarayî ya. 

 

9 serrî yo nîna dermankerdiş

 

9 serrî verê 2014ine de nêweşîya helnayîşê esteyan Gonule rê ame dayîş û bi 9 serrî yo nêameya dermankerdiş. Seba nêameye dermankerdiş zî nêweşîya ci kronîk bî.

 

Ameya sewîyeya peyîn

 

Gonule 16ê Tebaxa 2022ine de Nêweşxaneyê Gebze yê Fatîhî de yena dermankerdiş. Tîya de doktor vano nêweşîya to resaya sewîyeya peyîn û ganî tîya ra tepîya baldarî bibo, falîyetê giran meke, wuştiş û roniştiş de baldar bibe û xo mede zorî. Yeno dîyarkerdiş ke esteyê aye zaf xesas bîyê û seba nêweşî nêameya dermankerdiş sewîyeya tewr cor.

 

Antîdepresan dayî

 

Gonule eynî wextî de prosesê tepiştişî de bi xeylêk nêweşîyan reyde ameye rî bi rî. Kulîmekê aye îltîhab gêno û seba nê nêeşkena wurzo û roşo. Sewbîna movikê aye de fitq û gurçikê aye de zî sî esta. Pêwa nê nêweşîya vayî zî aye reyde esto. Doktorî vera ke nê nêweşîyan derman bikerê û dermanê goreyê nêweşîyan bidê, dermanê antîdepresan dayê Gonule. Doktoran seba ke dejê ci kêm bibo û hemverê dejê xover bido, antîdepresan dayê.

 

Hacetê ezgersizî nêdayî

 

Gonule dimayê demêk fek antîdepresanan ra vera da. Seba ke seba helînayîşê esteyî ra êdî nêeşkayîne rayra şêro û her reya ke Gonule şîne verê berê koxuşî rewşa aye tewr xerab bîne. Gonule ke rayrayîş de zehmetiyan ancena, xeylê demê xo mîyanê nivîne de derbaz kena. Seba nêweşî aver nêşêro, Gonule egzersizan bikero la hacetê egzersizan nînê dayîş.

 

Sewqê ATKyî kerdî

 

Peynîya serra 2022ine de Gonule seba taloqkerdişê înfazî muracat kena. Eynî wextî de Sibata 2023ine de îdareyê zîndanî seba tespîtkerdişê rewşa weşîye Gonule sewqê Sazgehê Tipê Edlî (ATK) yê Kocaeliyî keno. Raporê derheqê rewşa aye de hîna ATKyî eşkera nêkerdo.