RIHA - Çalakîya "Nobeta Edaletî" ya keyeyê Şenyaşarî roja 843ine de dewam kerd. Çalakîya ewro de no mesaj ame dayîş: “Heta ke edalet pê bêro do têkoşînê ma yê heqî dewam bikero.” 

 

14ê hezîrana serra 2018ine de merdim û pawitoxê Parlamenterê AKPyî yê Rihayî yê verê Îbrahîm Halîl Yildiz qezaya Pirsûsî ya Rihayî de hêrişê keyeyê Şenyaşarî kerd. Hêriş de mêrde û di lajê Emîne Şenyaşar ameyî qetilkerdiş. Emîne Şenyaşar û lajê aye Parlamenterê Partîya Çep a Keske yê Rihayî Ferît Şenyaşar ke qirkerdiş de bi birîndarî xelas bibi, 9ê adara 2021ine de vernîya Edlîyeyê Rihayî dest bi Nobeta Edaletî kerdibî. Çalakîya keyeyî roja 843ine de dewam kerd. Seba nêweşî, Emîne Şenyaşare nobete keyeyê xo yê Pirsûsî de dewam kerd.

 

Keyeyî serê hesabê xo yê medyaya dijîtale de nê mesajî pare kerd: “Îslamiyet, tenê ders û secde ra pê nîno. Îslam emir keno ke merdim adil û biedalet bibo. Yê ke hemverê zulmî de bêveng manenê, şeytanê bêziwan ê. Heta ke edalet pê bêro, do têkoşînê ma yê heqî dewam bikero.”