MERKEZÊ XEBERAN - Raportora NYyî bi raporêk taybet bale ant serê binpaykerdişê heqê cinîyan ê Tirkîya û vakurê Kurdistanî û vat: "10 cinîyan ra 4 jê ci ra bi şîdetî reyde rî bi rî manenê.”

 

Raportora Taybete ya Sebeb û Netîceyanê Şîdetê Vera Cinîyan ê Neteweyanê Yewbîyayeyan (NY) Reem Alselame raporê xo yê şîdetê vera cinîyan ê Tirkîya çarçeweya Roniştişanê Heqanê Merdiman ê 53ine yê Konseya Heqanê Merdiman a Ofîsê Cenevre yê NYyî de weşana.

 

Neteweyanê Yewbîyayeyan ra Raportara Taybete Reem Alselame bale ante şîdetê dewleta tirke yê vera cinîyanê kurdan û wina vat: “Mekanîzmayanê bêhet û zelalan ronê ke wa şîdetê vera cinîyan ê kurdan bêrê cigêrayîş û hêrişkarî bêrê cezakerdiş.”

 

Raportora Taybete Reem Alselame raporê xo yê 19 pelan de cayo taybet da şîdetê serê cinîyan ê kurdan û bale ante hêrişanê leşker û polîsanê tirkan ê vera cinîyan ê kurdan û PKKyijan ser.

 

Rapor de ame vatiş ke 10 cinîyan ra 4 jê ci ra bi şîdetî reyde rî bi rî manenê û no zanayîş ame parekerdiş: “Cinîyê kurdî bitaybetî binê rîskî de yê. Cinîyê kurdî rîyê nasname û ziwanê xo ra raştê şîdetî yenê. Heqê înan yenê bipaykerdiş. Reyna şerê vera PKKyî de zafê ci cinîyî kurdê sîvîlî yenê qetilkerdiş û raştê şîdetê cînsî yenê. Reyna cinî û kênayê kurdan tim raştê tacîz û tehdîtan yenê. Zafê înan bi hewayêkê keyfî yenê destbendkerdiş û muhakemekerdişanê nehaqan de rî bi rî manenê. Coka ma semedê cinîyan ê kurdan qerqilîyenê.”

 

Raportora Taybete Reem Alselame veng da ke wa hêrişê artêşa tirke yê vera cinîyan ê kurdan bêrê cipersayîş û nê vatî: “Şîdetê cînsî yê vera cinîyanê kurdan cibigêrê, ceza bidê berpirsîyaran. Mekanîzmayanê bêhet û zelalan ronê ke wa şîdetê vera cinîyan ê kurdan bêrê cigêrayîş û hêrişkarî bêrê cezakerdiş.”