STENBOL - Hemsereka HDPyî ya Stenbolî Îlknur Bîrole dîyar kerd ke kombîyayîşê ke HDP û Partîya Çep a Keske pê ardî de ‘Agêrayîşê raştîya xo’ vejîya raşte û vat ke do badê kombîyayîşan şêrê kongre û rêxistinbîyayîşê cinîyan gird bikerê. Îlknure venga cinîyan kerd ke tewrê kombîyayîşî bibê.

 

Partîya Demokratîke ya Şaran (HDP) û Partîya Çep a Keske badê weçînayîşanê 14 û 28ê Gulane her cayê Kurdistan û Tirkîya de kombîyayîşê şarî pê anê. HDPyê Umranîye de zî startê kombîyayîşê cinîyan ame dayîş û kombîyayîş de ame dîyarkerdiş ke vera heme kêmanîyan têkoşînê şarê kurdî û şaranê bînan xurt o. heto bîn de kombîyayîşan de ame dîyarkerdiş ke do vera faşîzmî de pîya têkoşîn bikerê û rayîrê serkewtişî rêxistinbîyayîşê cinîyan ra derbaz beno. 

 

Badê kombîyayîşan do cinîyî şêrê kongre 

 

Temsîlkarê HDP û Partîya Çek a Keske prosesê rexne û xorexnekerdişî kerdî cuye. Pêşnîyazê çareserî û tespîtî ameyî kerdiş. Badê kombîyayîşê şarî do bi rêxistinê komelê sivîl, roşnvîr û nuştoxan reyde kombîyayîş pê bêrê. Heto bîn de badê kombîyayîşan do şêrê konferans û kongreyan. 

 

Hemsereka HDPyî ya Stenbolî Îlknur Bîrole derheqê kombîyayîşê ke Stenbol de pê ameyî de JINNEWSî rê ercnayîş kerd. 

 

Do şar bibo cewab 

 

Îlknure dîyar kerd ke badê weçînayîşan kêmanîyê ke vejîyayî raşte kombîyayîşan de ameyî ercnayîş û  wina dewam kerd: “Ma cewabê persê ‘ganî se bêro kerdiş’ bi şarî reyde hewl da ke bidê. Badê ercnayîşê merkez û qezayan kombîyayîşê şarî dest pêkerdî. Kombîyayîşê ke mebenê 10-25ê Temmuze de pê yenê do biresê heme hetan. Hedefê ma no yo ke ma xo biresnê heme hemwelatijan. Ma do rexne û pêşnîyazê şarê xo bigîrê.” 

 

‘Amac dewamkerdişê têkoşînî yo’  

 

Îlknure dewamê qiseykerdişê xo de da zanayîş ke HDP û Partîya Çep a Keske partîyê bînan ra wetêr şarî ra hêzê gênê û wina vat: “Partîyê sîstemî ra cîyayêr ma waşt ke xo newe bikerê û ma kewtî prosesêk winasî. Partîyê sîstemî nê çîyî nêkenê. Amacê caardişê kombîyayîşê şarî no yo ke ma têkoşîn û rêxistinbîyayîşê xo dewam bikerê. Ma startê kombîyayîşê şarî Marmaraye de bi kombîyayîşê şarî da. HDP partîya cinîyan o. Ma do têkoşînê rêxistinbîyayîşê cinîyan berz bikerê.” 

 

Lazimîya şarî bi rêxistinbîyayîşî esta 

 

Îlknure tewr peynî ard ziwan ke kombîyayîşan de derheqê ‘Agêrayîşê raştîya xo’ de rexne ameyî kerdiş û bi israr her raşteyî ra ‘Agêrayîşê raştîya xo’ ame waştiş. Îlknure na babete de zî wina vat: “Raştîya rêxistinbîyayîşê şarî esta. Agêrayîşê raştîya xo do zemînê rêxistinî ganî bikero. Raştîya xo rêxistinkerdiş a. Raştî cuya ke ma ciwîyenê. Sey sîstemê raştîya xo ra agêrayîş ma do şêrê her ca. Ma do keye bi keye, tax bi taxe, raşte bi raşte bigêrê. Ma do esasê rexneyê şarî de prosesî newe bikerê. Ma do mekanîzmayê agêrayîşê raştîya xo awan bikerê.  Ganî sere de cinî, her kes paştî bido nê prosesî.”