STENBOL - 11 Dayîkê Aştîye û 2 rojnamegerê ke paştdayîş dayî çalakîya grevê vêşanîya ke tecrîdê serê Rayberê PKKyî Abdullah Ocalanî de dabî destpêkerdiş, veradîyayî.

 

Bi serkêşîya Hemsereka Kongreya Komeleyê Demokratîke (KCD) Leyla Guven, hemverê tecrîdê girankerdeyê serê Rayberê PKKyî Abdullah Ocalanî de Zîndanê Tîpê Fyê Asayîşê Berzî yê Îmraliyî 8ê Teşrîna Peyêne 2018ine de grevê vêşanîye dabi destpêkerdiş, Dayîkê Aştîye 10ê Gulana 2019ine de bi amancê paştdayîşî verê Zîndanê Cinîyan ê Bakirkoyê Stenbolî de çalakî organîze kerdebî û polîsan hêrişê çalakîkeran kerdebî. Hêriş de 11 Dayîkê Aştîye û rojnameger Îrfan Tunççelîk û Ûmît Turhan Coşkun destbend bîbî. Roniştişê peyîn yê dewaya ke derheqê 13 kesê bi îdiayê "hemverê qanûnê kombîyayîş û protestoyî" û "serê nameyê rêxistine bê ke endamê rêxistine bê sûc kerdê" 23ine Dadgeha Cezaya Giran ya Çaglayanê Stenbolî de ame vînayîş. Roniştiş de avûkat Erman Ozturk û Xabat Demîrcan amade bî.

 

Dozgerî beraat waşt

 

Dozgerî roniştiş de fikrê xo yê serê  esasî de eşkera kerd û seba nêbîyayîşê hêmanê huqûqî yê sûc waşt kesê ke yenê muhakemekerdiş  beraet bikerê. Dima ra avûkatê ke dîyar kerdî ke ê bi nê fikrî rê razî yê, waştişê beraetî kerdî.

 

Beraet kerdî

 

Heyetê dadgehe dimayê 10 deqîqeyan mabêne roniştişê dewa de, qerarê xo eşkera kerd û dîyar kerd ke hêmanê huqûqî yê sûcî nêameyê tespîtkerdiş û 11 Dayîkê Aştîye û rojnameger Îrfan Tunççelîk û Ûmît Turhan Coşkun beraet kerdî. Qerarê qedexeyê tebervejîyayîşê kuçeyan derheqê eynî kesan de zî ame wedaritiş.