RIHA - Emînê Şenyaşar ke çalakîya nobeta edaletî de qisey kerd dîyar kerd ke eke edalet pê nêro, do çalakîya xo Anqara de dewam bikera. 

 

Nobeda Edaletî ya keyeyê Şenyaşarî ke merdim û pawitoxê parlementerê AKPyî yê verê Îbrahîm Yildiz 14ê Hezîrana 2018ine de Pirsûsê Rihayî de 3 ferdê ci qetil kerdibî, roja 840î de verê Edlîyeyê Rihayî de dewam kena. Dayike Emîne Şenyaşar û lajê aye Parlamenterê Partîya Çep a Keske yê Rihayî Ferît Şenyaşar keyeyê xo yê qezaya Pirsûsî ra kewtî rayîr  û ameyî verê Edliyeya Rihayê û cayê ke sey "Quncikê Edaletî yê keyeyê Şenyaşarî" yeno binamekerdiş, dest bi nobete kerdî. Keyeyî pankartê ke serê "5 serrî yo ma tenê edalet wazenê” uca daliqnayî.

 

Çalakî de dayike Emîne Şenyaşar qisey kerd. Dayîke wina vat: "Ma paweyê edaletî yê. Wa lajê mi bêro keye, wa edalet pê bêro. 18ê temmuze de dewaya ma Meletî de esta, venga ma oyo ke wa heme kesî bêrê paştdayîşê ma bikerê û ma bi tenê meverdê. Edî bes o, wa lajê mi vera bidê. Eke lajê mi bêro veradayîş, ez o bêrî keyeyê xo la eke edalet pê nêro ez o şêrî Anqara, verê Wezaretê Edaletî roşî. Heta lajê mi nêro veradayîş ez fek çalakîya xo ra vera nêdana. Heme kesî bi zilmê ke ma rê ameyo kerdiş zano. Çira kiştoxî nêtepişnenê? Wa pêro kiştoxî bêrê tepiştiş. Keyeyê mi vila kerdî, qeydê înan esto çira qeydan nêvejenê? Nêweşxane de merdimî nînê kiştiş, wa kiştoxî bêrê cezakerdiş.”