RIHA - Nobeta Edaletî roja 839ine de dewam kena  Emîne û Ferît Şenyaşar mesajê "Ma seba edaletî nêvindenê” pare kerdî.

 

9ê Adara 2021ine de Edlîyeyê Rihayî de Emîne Şenyaşar ke mêrde û 2 lajê aye qezaya Pirsûsî ya Rihayî de hetê pawitox û merdimanê Wekîlê AKPyî yê verê Îbrahîm Halîl Yildiz ra ameyî qetilkerdiş û lajê aye Ferît Şenyaşar bi birîndarî xelas bi, Nobeta Edaletî ke seba nê dest pêkerd, roja 839ine de dewam kena. Seba ke peynîya hewteyî edlîye padaye yo, çalakîya keyeyî banê xo Pirsûsî de dewam kerd.

 

Keyeyî serê hesabê xo yê medyaya dîjîtale de nê çî pare kerd: “Werte ra wedarnayîşê edaletî şerê hemverê kaînatî yo. Werte de sûcê merdimayî esto. Kerdoxê hema zî tepişte nîyê… Edaleto ke ma gêrenê seba hemine yo.”