Dîlan Babat

 

ANQARA - Hemsereka DFGyî Dîcle Muftuoglu ke zîndanê Cinîyan ê Sîncanî de tepişte ya, seba roniştişê dewaya 16 rojnamegerê ke 11ê Temmuze de Amed de bêro vînayîş venga tewrbîyayîşî kerd û vat: “Tu zext nêeşkeno vernîya ma pado. Ma do heqîqet her tim bîyarê ziwan.” 

 

Çarçewaya cipersayîşê ke merkezê ci Anqara bî û 15 bajaran de operasyon pê ame de hemsereka Komeleya Rojnamegeran a Dîcle Firatî (DFG) Dîcle Muftuoglu 3yê Gulane de ameye destbendkerdiş. Dîcle derheqê 16 rojnamegerê ke 8ê hezîrane de Amed de ameyî tepiştiş û roniştişê înan 11ê Temmuze de yeno vînayîş ajansê ma rê qisey kerd.

 

‘Rojnamegerî nêeşkena bêra hepskerdiş’

 

Dîcle da zanayîş ke Roja Azadîya Çapemenîya Dinya de bi edîtorê Ajansê Mezopotamyayî (MA) Sedat Yilmazî reyde ameya tepiştiş û vat: “Na noktaya ke  azadîya fikr û fehmî hende teng bîya de zîndanî seba  rojnamegeran bîyê cayê dinge. Bêşik rojnamegerî çîyo ke bêra hepskerdiş nîya. Seba rojnamegeran her raşte, her ca cayê xeberan o. Her çî û her kesê ke derûdorê çimeyê xeberan o. Wexto ke ma teber de bî zî zîndanî raşteyê xeberan bî. Ma binpaykerdişê ke zîndanan de kenê, kenê xeber û komeleyî de hewl danê ke ez binpaykerdişan bikerî rapor. Mi hewl dayîne bi ferz û mîqyasê meslegî nînan binusî û bi rayapêroyî rê bidî eşnawitiş. Zîndan de roja mi bi wendiş û nuştişî derbaz bena. Ma hemverê kesê ke vernîya ma de benê astengî bi nuştiş vindertişê xo ramojnenê.”

 

‘Kes nêeşkeno vernîya heqîqetî pado’

 

Dîcle dewam de bale ant serê hêrişê hemverê çapemenîya azad û vat, hêrişê hemverê çapemenîya azade bi 30 serrî ra zêdeyêr o bi hetê cîya yenê rayraberdiş û vat: “Nê teda pêro hewldayîşê sîyakerdişê heqîqetî yo. Îqtîdar, partî vuryayî la timî rojnamegerê ke heqîqet nuştî hedef ameyî girewtiş. Serrêke de operaysonê pîlî ameyî kerdiş û embazanê ma tepiştî. La ez reyke bîn bîyarî vîr; tu zext nêeşkeno vernîya nuşteyê ma yê heqîqetî pado. Ma do her şert û mercî de binusê.” 

 

Seba tewrbîyayîşê dewa vengdayîş

 

Dîcle bale ant serê dewaya 16 rojnamegerê ke do 11ê Temmuze de pê bêro û wina qedêna: “11ê Temmuze de do 15 ci ra tepişte, 18 embazê ma vejîyê vernîya mehkema. Serrêke nê embazê ma bi hawayêkê bêhuqûqî tepişte yê. Waştişê ma oyo ke embazê ma bêrê veradayîş. Ez venga pêro rojnameger, rêxistinê meslegî û demokratîkî kena ke tewrê roniştişê ke do Edlîyayê Amedî de pê bêro, bibê.”